(មូស្គូ)៖ អភិបាលក្រុងមូស្គូ លោក Sergei Sobyanin បានឱ្យដឹងនៅថ្ងៃចន្ទ ទី២០ ខែកក្កដា ឆ្នាំ២០២៦ ថាអ៊ុយក្រែនបានបាញ់ដ្រូនច្រើនជាង ៤០០គ្រឿង តម្រង់ទៅរកតំបន់រដ្ឋធានីមូស្គូ តែក្នុងនោះភាគច្រើនលើសលុបនៃដ្រូនទាំងនេះត្រូវបានបាញ់ទម្លាក់។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ក្នុងការបង្ហោះមួយលើបណ្ដាញទំនាក់ទំនងសង្គម MAX គាំទ្រដោយរដ្ឋរុស្ស៉ី លោក Sergei Sobyanin បានបញ្ជាក់ថាចាប់ពីម៉ោង ៨៖៣០នាទីយប់ថ្ងៃអាទិត្យ រហូតដល់ម៉ោង ៥៖០០នាទីព្រឹកថ្ងៃចន្ទ ដ្រូនរបស់សត្រូវច្រើនជាង ៤០០គ្រឿងបានហោះតម្រង់ទៅរកតំបន់រដ្ឋធានីមូស្គូ។ លោកបន្ថែមថាភាគច្រើនច្រើនលើសលុបនៃដ្រូនទាំងនោះត្រូវបានបាញ់ទម្លាក់ពីចម្ងាយ ហើយមាន៨៥គ្រឿងត្រូវបានកម្ទេចនៅពេលពួកវាហោះនៅក្បែររដ្ឋធានីមូស្គូ។

អ៊ុយក្រែនបាន និងកំពុងបង្កើនការវាយប្រហារដ្រូនក្នុងពេលប៉ុន្មានខែថ្មីៗនេះលើទឹកដីរុស្ស៉ី ដោយចាត់ទុកថានេះជាការសងសឹកទៅនឹងការទម្លាក់គ្រាប់បែករបស់រុស្ស៉ីលើទឹកដីរបស់ខ្លួនក្នុងសង្រ្គាមជាង ៤ឆ្នាំមកនេះ។ សារព័ត៌មានរុស្ស៉ី TASS បានរាយការណ៍ដាច់ដោយឡែកថាកាលពីថ្ងៃចន្ទ មានមនុស្ស ៦នាក់ ក្នុងនោះមានជនបរទេស ៣នាក់ ត្រូវបានបញ្ជូនទៅកាន់មន្ទីរពេទ្យក្រោយរងរបួសក្នុងការផ្ទុះនៅរដ្ឋធានីមូស្គូ។ ប៉ុន្តែមិនទាន់មានការបញ្ជាក់ថាអ្នកដែលរងរបួសទាំងនេះបង្កឡើងដោយ ឬជាប់ពាក់ព័ន្ធនឹងការវាយប្រហារដោយដ្រូនរបស់អ៊ុយក្រែនឬក៏យ៉ាងណានោះទេ៕