(តៃប៉ិ)៖ ក្រុមមន្ត្រីតៃវ៉ាន់បានអះអាងពីការកើនឡើងយ៉ាងខ្លាំងនៃសកម្មភាពនាវាឆ្មាំសមុទ្រ និងនាវាស្រាវជ្រាវរបស់ចិននៅជុំវិញ ដែនកោះតៃវ៉ាន់កាលពីខែមិថុនា ក្នុងបរិបទដែលប៉េកាំងបន្តធ្វើយុទ្ធនាការដាក់សម្ពាធលើតៃប៉ិ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី២០ ខែកក្កដា ឆ្នាំ២០២៦។

ទិន្នន័យពីឆ្មាំសមុទ្រតៃវ៉ាន់បានឱ្យដឹងថាតៃវ៉ាន់បានប្រទះឃើញនាវារដ្ឋាភិបាលចិន ៥៥គ្រឿង ក្នុងនោះរួមមានទាំងនាវាឆ្មាំសមុទ្រ និងនាវាស្រាវជ្រាវ នៅជុំវិញដែនកោះតៃវ៉ាន់ កាលពីខែមិថុនា ពោលគឺកើនឡើងពី៣០គ្រឿងកាលពីខែឧសភា។

តួលេខនេះដែរបានបញ្ជាក់ពីការកើនឡើងតួនាទីរបស់ឆ្មាំសមុទ្រចិន នៅក្នុងយុទ្ធនាការដាក់សម្ពាធរបស់ប៉េកាំងប្រឆាំងនឹងតៃវ៉ាន់ដែលបាន និងកំពុងបង្កការព្រួយបារម្ភដល់តៃវ៉ាន់ និងបណ្ដាប្រទេសលោកខាងលិចមួយចំនួនរួមមានសហរដ្ឋអាមេរិក បារាំង អង់គ្លេស និងអាល្លឺម៉ង់។ ចិនបានធ្វើសកម្មភាពយោធាស្ទើរតែជាប្រចាំនៅជុំវិញតៃវ៉ាន់។ ប៉ុន្តែបច្ចុប្បន្ន ចិនបានបង្កើនការប្រើប្រាស់នាវាឆ្មាំសមុទ្រដើម្បីអះអាងអធិបតេយ្យទឹកដីរបស់ខ្លួនលើតៃវ៉ាន់។

តាមក្រុមមន្ត្រីតៃវ៉ាន់ ការកើនឡើងនៃសកម្មភាពនាវាឆ្មាំសមុទ្រចិន អាចមកពីប៉េកាំងកំពុងសិក្សាថាតើត្រូវកាត់ផ្ដាច់ខ្សែច្រវ៉ាក់ផ្គត់ផ្គង់របស់តៃវ៉ាន់ក្នុងតំបន់ប៉ាស៊ីហ្វិក ពីសម្ព័ន្ធមិត្ត យ៉ាងដូចម្ដេច៕