(ញូវដែលី)៖ អាជ្ញាធរនិងប្រព័ន្ធផ្សព្វផ្សាយក្នុងស្រុករបស់ឥណ្ឌា បានឱ្យដឹងថា គ្រោះទឹកជំនន់ភ្លាមៗ បូករួមជាមួយហេតុការណ៍រអិលបាក់ដី ដែលបង្កឡើងដោយភ្លៀងមូសុង បានឆក់យកជីវិតមនុស្សយ៉ាងហោច១៩នាក់ កាលពីថ្ងៃអាទិត្យ ទី១៩ ខែកក្កដា ឆ្នាំ២០២៦។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

មនុស្ស៨នាក់បានបាត់បង់ជីវិត នៅរដ្ឋ Nagaland ភាគឦសាន ក្បែរប្រទេសមីយ៉ាន់ម៉ា ខណៈ១១នាក់ផ្សេងទៀតបានស្លាប់ នៅតំបន់ Jammu & Kashmir។ ក្រៅពីសម្លាប់មនុស្ស ទឹកជំនន់ក៏បានបង្កការខូចខាតធ្ងន់ធ្ងរ ចំពោះទ្រព្យសម្បត្តិសាធារណៈនិងឯកជនផងដែរ ហើយជះផលរំខានចំពោះមនុស្សជាច្រើននាក់ផ្សេងទៀត។ ទន្ទឹមគ្នា អាជ្ញាធរបានព្រមានពីការបន្តធ្លាក់ភ្លៀងខ្លាំង ​សម្រាប់ប៉ុន្មានថ្ងៃខាងមុខទៀត ខណៈប្រតិបត្តិការជួយសង្រ្គោះ កំពុងត្រូវបានបង្កើនកិច្ចប្រឹងប្រែងបន្ថែម នៅតាមតំបន់ដែលប៉ះពាល់។

គួរបញ្ជាក់ថា ទឹកជំនន់និងឧបទ្ទវហេតុពាក់ព័ន្ធផ្សេងៗ គឺជារឿងកើតមានឡើងរៀងរាល់ឆ្នាំ នៅទូទាំងប្រទេសឥណ្ឌា អំឡុងរដូវភ្លៀង ដែលមកដល់បន្ទាប់ពីរដូវក្តៅដ៏វែងអន្លាយ ដែលជាពេលផ្នែកជាច្រើននៃប្រទេសអាស៉ីខាងត្បូងមួយនេះ តែងប្រឈមមុខជាមួយបញ្ហាខ្វះខាតទឹកខ្លាំង និងស្ថានភាពដូចគ្រោះរាំងស្ងួត៕