(វ៉ាស៉ីនតោន)៖ កាលពីថ្ងៃអាទិត្យ ទី១៩ ខែកក្កដា ឆ្នាំ២០២៦ រដ្ឋមន្រ្តីការបរទេសសហរដ្ឋអាមេរិក លោក Marco Rubio បាននិយាយថា រូបលោកបើកចំហសម្រាប់ការជួបសមភាគីចិននិងរុស្ស៉ី ក្នុងសប្តាហ៍នេះ អំឡុងពេលលោកស្ថិតនៅប្រទេសហ្វីលីពីន ក្នុងឱកាសចូលរួមព្រឹត្តិការណ៍កិច្ចប្រជុំនៃក្រុមរដ្ឋមន្រ្តីការបរទេសអាស៊ាន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

វត្តមានរបស់លោក Rubio ក្នុងកិច្ចប្រជុំរបស់អាស៊ាននៅទីក្រុងម៉ានីល គឺចំពេលដែលសហរដ្ឋអាមេរិក កំពុងព្យាយាមទប់ទល់​ការកើនឡើងនៃឥទ្ធិពលរបស់ចិននៅក្នុងតំបន់ និងបន្ទាប់ពីថ្មីៗនេះ ប្រធានាធិបតីអាមេរិក លោក ដូណាល់ ត្រាំ ទើបតែបានចោទប្រកាន់ទីក្រុងប៉េកាំង ពីការលូកលាន់ដំណើរការបោះឆ្នោតរបស់សហរដ្ឋអាមេរិក។

ឆ្លើយតបសំណួររបស់អ្នកកាសែត ដែលបានសួរថាតើនឹងមានជំនួបជាមួយរដ្ឋមន្រ្តីការបរទេសចិន លោក Wang Yi ឬជាមួយរដ្ឋមន្រ្តីការបរទេសរុស្ស៉ី លោក Sergei Lavrov ដែរឬអត់ លោកប្រមុខការទូតអាមេរិក បានឆ្លើយតប រូបលោកនឹងបើកចំហក្នុងការជួបរដ្ឋមន្រ្តីទាំងពីរ ប៉ុន្តែលោកនឹងមិនបង្ហើបឱ្យដឹងពីប្រធានបទ ដែលអាចពិភាក្សានោះទេ។ លោក Rubio បានជួបលោក Wang នៅអំឡុងកិច្ចប្រជុំអាស៊ានក្នុងទីក្រុងគូឡាឡាំពួប្រទេសម៉ាឡេស៉ី កាលពីឆ្នាំ២០២៥ ហើយអ្នកទាំងពីរក៏បានសន្ទនាគ្នាតាមទូរស័ព្ទផងដែរ ក្រោយទស្សនកិច្ចរបស់លោក ត្រាំ នៅប្រទេសចិន កាលពីខែឧសភា។

គួរបញ្ជាក់ថា ដំណើរទស្សនកិច្ចទៅកាន់ហ្វីលីពីន ដែលជាលើកដំបូងសម្រាប់លោក Rubio ក្នុងនាមជារដ្ឋមន្រ្តីការបរទេសអាមេរិក គឺកើតឡើងស្របពេលសម្ព័ន្ធមិត្តក្នុងតំបន់ កំពុងស្ថិតក្រោមសម្ពាធសេដ្ឋកិច្ច បង្កឡើងដោយ​ការផ្ទុះកម្តៅឡើងវិញនៃសង្រ្គាមអាមេរិកជាមួយអ៉ីរ៉ង់។ ក្រៅពីលោក Rubio រដ្ឋមន្រ្តីការបរទេសប្រទេសដទៃទៀតក្នុងតំបន់ ដូចជាឥណ្ឌា ជប៉ុន និងអូស្រ្តាលី ក៏នឹងមកចូលរួមកិច្ចប្រជុំអាស៊ាននៅហ្វីលីពីន ផងដែរ៕