(មូស្គូ)៖ ទីក្រុងមូស្គូបានឱ្យដឹងថា កាលពីថ្ងៃអាទិត្យ ទី១៩ ខែកក្កដា ឆ្នាំ២០២៦ ប្រធានាធិបតីរុស្ស៉ី លោក វ៉្លាឌីមៀ ពូទីន បានជួបជាមួយរដ្ឋមន្រ្តីការបរទេសកូរ៉េខាងជើង លោកស្រី Choe Son Hui នៅឯវិមានក្រឹមឡាំង ហើយលោកបានអរគុណ​លោកស្រី សម្រាប់ការជួយគាំទ្ររបស់កូរ៉េខាងជើង ក្នុងអ្វីដែលទីក្រុងមូស្គូបន្តហៅថា ប្រតិបត្តិការយោធាពិសេសនៅអ៊ុយក្រែន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

កាលពីឆ្នាំ២០២៤ កងទ័ពកូរ៉េខាងជើងបានជួយរុស្ស៉ី វាយបណ្តេញការលុកលុយធំមួយរបស់អ៊ុយក្រែន ចូលមកក្នុងតំបន់ Kursk ភាគខាងលិចប្រទេសរុស្ស៉ី។ ក្រោមសន្ធិសញ្ញាជួយការពារគ្នាទៅវិញរវាងប្រទេសទាំងពីរ កូរ៉េខាងជើងបានបញ្ជូនទាហានប្រហែល ១៤០០០នាក់ ទៅជួយរុស្ស៉ីប្រយុទ្ធនៅតំបន់ Kursk។ កងកម្លាំងអ៊ុយក្រែន បានវាយលុកចូល Kursk កាលពីខែសីហា ឆ្នាំ២០២៤ ហើយកាន់កាប់ទឹកដីបានច្រើនគួរសមនៅទីនោះ អស់រយៈពេលប៉ុន្មានខែ មុនត្រូវបង្ខំឱ្យដកថយចេញទៅវិញ។

គួរបញ្ជាក់ថា បើតាមសេចក្តីថ្លែងការណ៍របស់វិមានក្រឹមឡាំង លោកស្រី Choe បាននិយាយក្នុងជំនួបជាមួយលោក ពូទីន ថាមេដឹកនាំកំពូលកូរ៉េខាងជើង គឺលោក គីម ជុងអ៊ុន នាពេលថ្មីៗនេះ បានបញ្ជាក់ជាថ្មីពីការប្តេជ្ញារបស់ទីក្រុងព្យុងយ៉ាង ចំពោះការអភិវឌ្ឍដោយគ្រប់ជ្រុងជ្រោយនៃទំនាក់ទំនងជាមួយប្រទេសរុស្ស៉ី៕