រដ្ឋមន្ត្រីសិង្ហបុរីលាលែងពីតំណែង ក្រោយជាប់រឿងអាស្រូវទាក់ទងជាមួយស្ត្រីម្នាក់ (Video inside)
20-07-2026 19:35
(សិង្ហបុរី)៖ លោកនាយករដ្ឋមន្ត្រី ឡរ៉េន វ៉ុង (Lawrence Wong) បានប្រកាសនៅថ្ងៃចន្ទថា រដ្ឋមន្ត្រីស្តីទីទទួលបន្ទុកកិច្ចការឥស្លាម លោក ហ្វៃសាល អ៊ីប្រាហ៊ីម (Faishal Ibrahim) បានលាលែងពីតំណែង និងចាកចេញពីគណបក្សកាន់អំណាច បន្ទាប់ពីជាប់ពាក់ព័ន្ធនឹងរឿងអាស្រូវទំនាក់ទំនងជាមួយស្ត្រីម្នាក់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
យោងតាមលោក វ៉ុង អ្នកទាំងពីរមានទំនាក់ទំនងគ្នាតាមរយៈការផ្ញើសារអនឡាញ និងជួបគ្នានៅក្រៅកម្មវិធីសាធារណៈ មុនពេលពួកគេប្តឹងផ្តល់គ្នាទៅវិញទៅមកពីបទបៀតបៀន។ ទោះបីជាប៉ូលិសស៊ើបអង្កេតមិនឃើញមានបទល្មើសព្រហ្មទណ្ឌក្តី ប៉ុន្តែលោក វ៉ុង បញ្ជាក់ថា អាកប្បកិរិយារបស់លោក ហ្វៃសាល គឺមិនស័ក្តិសមជាមន្ត្រីជាន់ខ្ពស់ និងជាសមាជិកសភាឡើយ។
នៅក្នុងលិខិតលាលែង លោក ហ្វៃសាល បានទទួលស្គាល់កំហុសឆ្គងរបស់ខ្លួន ដែលមិនបានកំណត់ព្រំដែនទំនាក់ទំនងឱ្យបានច្បាស់លាស់ ទោះបីជាលោកអះអាងថាមិនមានទំនាក់ទំនងស៊ីជម្រៅជាមួយស្ត្រីនោះក៏ដោយ។
គួររំលឹកថា គណបក្សសកម្មភាពប្រជាជន (PAP) ដែលតែងតែមានមោទនភាពចំពោះភាពស្អាតស្អំរបស់ខ្លួន បានរងភាពចម្រូងចម្រាសជាបន្តបន្ទាប់ក្នុងរយៈពេលថ្មីៗនេះ។ ជាក់ស្តែង អតីតរដ្ឋមន្ត្រីដឹកជញ្ជូន លោក S. Iswaran ទើបតែត្រូវបានកាត់ទោសឱ្យជាប់គុក ១២ខែ ពីបទទទួលសំណូកកាលពីដើមឆ្នាំ២០២៤ ខណៈដែលសមាជិកសភាជាន់ខ្ពស់មួយចំនួន ក៏បានលាលែងពីតំណែងដោយសាររឿងអាស្រូវផ្លូវភេទផងដែរ៕
