(ម៉ូស្គូ)៖ ប្រទេសរុស្ស៊ី នៅថ្ងៃចន្ទ បានចោទប្រកាន់អ៊ុយក្រែនថា បានប្រើប្រាស់ដ្រូនវាយប្រហារទៅលើរថយន្តក្រុងដឹកអ្នកដំណើរមួយគ្រឿងនៅក្នុងតំបន់បែលហ្គោរ៉ូដ (Belgorod) របស់រុស្ស៊ី ដែលបណ្តាលឱ្យជនស៊ីវិលចំនួន ៥នាក់បាត់បង់ជីវិត (ក្នុងនោះមានអនីតិជនម្នាក់) និង ៣នាក់ផ្សេងទៀតរងរបួសធ្ងន់ធ្ងរ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

អាជ្ញាធរក្នុងតំបន់បានថ្កោលទោសការវាយប្រហារនេះយ៉ាងខ្លាំង ដោយចាត់ទុកថាជា «ទង្វើភេរវកម្មដ៏ឃោរឃៅ និងអមនុស្សធម៌» ដែលកំណត់គោលដៅដោយចេតនាទៅលើរថយន្តក្រុងស៊ីវិលនៅក្នុងទីក្រុង Shebekino។ ជនរងគ្រោះដែលស្លាប់រួមមានស្ត្រី ៤នាក់ និងក្មេងប្រុសម្នាក់។

គួរបញ្ជាក់ថា តំបន់ Belgorod គឺស្ថិតនៅជាប់ព្រំដែនជាមួយតំបន់ខាគីវ (Kharkiv) របស់អ៊ុយក្រែន ហើយតំបន់នេះតែងតែរងការវាយប្រហារជាប្រចាំពីកងកម្លាំងទីក្រុងកៀវ ចាប់តាំងពីរុស្ស៊ីបើកការឈ្លានពាននៅដើមឆ្នាំ២០២២ មកម្ល៉េះ បើទោះបីជាភាគីទាំងសងខាងតែងតែបដិសេធថា មិនបានកំណត់គោលដៅវាយប្រហារដោយចេតនាលើជនស៊ីវិលក៏ដោយ៕