(អូដេសា)៖ មន្ត្រីអ៊ុយក្រែនបានឱ្យដឹងកាលពីថ្ងៃចន្ទថា ការវាយប្រហារដោយមីស៊ីលរបស់រុស្ស៊ីទៅលើនាវាដឹកពោតមួយគ្រឿងនៅក្បែរកំពង់ផែអូដេសា (Odesa) ភាគខាងត្បូងអ៊ុយក្រែន បានសម្លាប់មនុស្សចំនួន ១០នាក់។ នេះគឺជាការវាយប្រហារដ៏សាហាវបំផុត នៅក្នុងការកើនឡើងនៃអំពើហិង្សាជាច្រើនសប្តាហ៍មកនេះ នៅក្នុងតំបន់សមុទ្រខ្មៅ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

កងទ័ពជើងទឹកអ៊ុយក្រែនបានបញ្ជាក់ថា រុស្ស៊ីបានបាញ់មីស៊ីលគ្រូសចំនួន ៣គ្រាប់ ទៅលើនាវា Golden Leo ដែលប្រើប្រាស់ទង់ជាតិហ្គីណេប៊ីសាវ (Guinea-Bissau) និងមាននាវិកជាជនជាតិឥណ្ឌា និងស៊ីរី បណ្តាលឱ្យមានអគ្គិភ័យឆាបឆេះកាលពីថ្ងៃអាទិត្យ។

អាជ្ញាធរកំពង់ផែអ៊ុយក្រែនបានឱ្យដឹងថា ប្រតិបត្តិការរុករក និងជួយសង្គ្រោះបានបន្តពេញមួយយប់ ដោយនាវិក ៨នាក់ (ក្នុងចំណោម ១៧នាក់) ត្រូវបានជួយសង្គ្រោះ ខណៈនាវិក ៩នាក់ និងអ្នកបើកបរនាវាសមុទ្រម្នាក់បានស្លាប់។ នាវា Golden Leo គឺជាកម្មសិទ្ធិរបស់ក្រុមហ៊ុន Ocean Grace Shipping Ltd ដែលមានមូលដ្ឋាននៅទីក្រុងមុមបៃ (Mumbai) ប្រទេសឥណ្ឌា។ មកទល់ពេលនេះ ទាំងក្រុមហ៊ុនម្ចាស់នាវា និងរដ្ឋាភិបាលទីក្រុងមូស្គូនៅមិនទាន់មានការឆ្លើយតប ឬបកស្រាយជុំវិញហេតុការណ៍នេះនៅឡើយទេ។

ដោយឡែក នៅក្នុងការវាយប្រហារដាច់ដោយឡែកមួយទៀតមកលើទីក្រុង Odesa ដែលជាកំពង់ផែសមុទ្រដ៏ធំបំផុតរបស់អ៊ុយក្រែន នៅថ្ងៃចន្ទ ក៏បានសម្លាប់មនុស្ស ៣នាក់ និងរបួស ៣នាក់ផ្សេងទៀតផងដែរ បន្ទាប់ពីរុស្ស៊ីបានវាយប្រហារលើគោលដៅហេដ្ឋារចនាសម្ព័ន្ធនៅក្នុងទីក្រុងនេះ៕