(វ៉ាស៉ីនតោន)៖ ប្រធានាធិបតីអាមេរិក លោក ដូណាល់ ត្រាំ បានចុះហត្ថលេខាលើបទបញ្ជាប្រតិបត្តិមួយ កាលពីថ្ងៃចន្ទ ទី២១ ខែកក្កដា ឆ្នាំ២០២៦ ដើម្បីដាក់ពន្ធគយ ៥០ភាគរយ លើទំនិញប៉ុន្មានប្រភេទរបស់កាណាដា ដោយអះអាងថាមានការប្រព្រឹត្តរើសអើង ពីសំណាក់ទីក្រុងអូតាវ៉ា ទៅលើផលិតផលគ្រឿងស្រវឹង ទឹកដោះគោ និងរថយន្តអាមេរិក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។

ពន្ធគយនេះនឹងចូលជាធរមាន ក្នុងរយៈពេល ៣០ថ្ងៃ ហើយគ្របដណ្ដប់លើទំនិញមួយចំនួន រួមមាន ស្រាក្រហម ដងវាយកូនបាល់ និងស៊ីម៉ងត៍។ នៅពេលប្រកាសអំពីពន្ធថ្មី សេតវិមានលើកឡើងថា កាណាដា ជាប្រទេសមួយក្នុងចំណោមប្រទេសតែពីរគត់ រួមទាំងចិន ដែលបានចាត់វិធានការតបត ចំពោះការដំឡើងពន្ធយ៉ាងទូលំទូលាយរបស់លោក ត្រាំ កាលពីឆ្នាំមុន។

តាមអ្នកតំណាងពាណិជ្ជកម្មអាមេរិក លោក Jamieson Greer កាណាដា បានដកផលិតផលគ្រឿងស្រវឹងរបស់សហរដ្ឋអាមេរិក ចេញពីធ្នើរលក់ទំនិញនានាក្នុងប្រទេសខ្លួន ផ្តល់លទ្ធភាពកាន់តែប្រសើរដល់ផលិតផលទឹកដោះគោ មកពីសហភាពអឺរ៉ុបចូលទីផ្សារកាណាដា និងបានកំណត់កម្រិតលើការនាំរថយន្តអាមេរិកទៅកាណាដា សម្រាប់រថយន្តរបស់ក្រុមហ៊ុន ដែលបានផ្លាស់ទីតាំងផលិតកម្មត្រឡប់ទៅអាមេរិកវិញ។ លោកបន្ថែមថា ការពន្ធគយថ្មីនេះ មានគោលបំណងឱ្យកាណាដា ទទួលខុសត្រូវចំពោះការសងសឹក និងការរើសអើងរបស់ខ្លួន។

គួរបញ្ជាក់ថា លោក ត្រាំ ដែលត្រូវបានតុលាការកំពូល បង្កាប់ឱ្យលុបចោលវិធានការដំឡើងពន្ធជាច្រើន កាលពីដើមឆ្នាំនេះ បានជ្រើសរើសយកបទប្បញ្ញត្តិច្បាប់មួយ ដែលមិនធ្លាប់ប្រើពីមុនមក ដើម្បីអនុវត្តការដំឡើងពន្ធថ្មីនេះ គឺមាត្រា ៣៣៨នៃច្បាប់ស្តីពីពន្ធគយឆ្នាំ១៩៣០ (Tariff Act of 1930)៕