(តេហេរ៉ង់)៖ កាលពីថ្ងៃចន្ទ ទី២០ ខែកក្កដា ឆ្នាំ២០២៦ ប្រធានាធិបតីអ៉ីរ៉ង់ លោក Masoud Pezeshkian បាននិយាយថា ប្រទេសរបស់លោក កំពុងស្ថិតក្នុងសង្រ្គាមពេញទំហឹងឡើងវិញ ជាមួយសហរដ្ឋអាមេរិក ហើយលោកបានសង្កត់ធ្ងន់ពីសារសំខាន់ នៃការរក្សាស្ថិរភាពសេដ្ឋកិច្ចនិងសង្គម អំឡុងពេលមានសង្រ្គាម។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ថ្លែងក្នុងកិច្ចប្រជុំជាមួយឧត្តមក្រុមប្រឹក្សាយុត្តិធម៌នៅរដ្ឋធានីតេហេរ៉ង់ លោក Pezeshkian បានលើកឡើងដូច្នេះថា​ «សង្រ្គាមនាពេលនេះ មិនមែនត្រឹមជាសង្រ្គាមនៃមីស៉ីលប៉ុណ្ណោះទេ។ សត្រូវបាន​ឈានដល់ការសន្និដ្ឋានថា ពួកគេមិនអាចបង្ខំឱ្យប្រជាជាតិអ៉ីរ៉ង់ចុះចាញ់ តាមរយៈការវាយប្រហារយោធាឡើយ។ យើងកំពុង​ស្ថិតក្នុងសង្រ្គាមពេញទំហឹង ហើយពួកយើងចាំបាច់ត្រូវតែប្រាកដនិយម និងទទួលយកផលវិបាកជាធម្មជាតិនៃការតស៊ូនេះ»។

លោកប្រធានាធិបតីអ៉ីរ៉ង់បានបន្តថា «សត្រូវកំពុងធ្វើសង្រ្គាមកូនកាត់ប្រឆាំងប្រទេសអ៉ីរ៉ង់ ហើយសមរភូមិដ៏សំខាន់បំផុតពេលនេះ គឺសេដ្ឋកិច្ចនិងជីវភាពរស់នៅរបស់ប្រជាជាន។ ប្រសិនបើសម្ពាធសេដ្ឋកិច្ចបង្កឱ្យមានភាពមិនពេញចិត្តក្នុងសង្គម ហើយបញ្ហានេះរីករាលដាល នោះមូលធនសង្គម ដែលប្រជាជនបានបង្កើតឡើងដើម្បីគាំទ្ររដ្ឋ អាចនឹងខូចខាតឬ​បាត់បង់»។

កាលពីខែមិថុនា អតិផរណានៅអ៉ីរ៉ង់ បានកើនឡើងយ៉ាងគំហុក ដោយសារតែសង្រ្គាមជាមួយអាមេរិក ដោយឈានដល់ចំណុចកំពូលជិត៩០ភាគរយ ធៀបនឹងរយៈពេលដូចគ្នាកាលពីឆ្នាំទៅ។ ដោយឡែក តួលេខសម្រាប់ខែកក្កដានេះ មិនទាន់មាននៅឡើយទេ។ កាលពីចុងឆ្នាំ២០២៥ ចលនាបាតុកម្មមួយ ដែលដំបូងឡើយកើតឡើង​ដោយសារបញ្ហាថ្លៃចំណាយខ្ពស់សម្រាប់ជីវភាពរស់នៅ បានប្រែក្លាយជាបាតុកម្មប្រឆាំងរដ្ឋាភិបាលទ្រង់ទ្រាយធំ ដែលផ្ទុះហិង្សា​ខ្លាំងធ្ងន់ធ្ងរ នៅខែមករា ដើមឆ្នាំនេះ ហើយបណ្តាលឱ្យមានមនុស្សស្លាប់យ៉ាងហោចរាប់ពាន់នាក់។

លោក Pezeshkian បានបន្ថែមថា រដ្ឋាភិបាលរបស់លោកបានការពារយ៉ាងពេញលេញ នូវសិទ្ធិនិងផលប្រយោជន៍ជាតិអ៉ីរ៉ង់ ក្នុងការចរចាជាមួយសហរដ្ឋអាមេរិក ក្នុងនោះរួមទាំងអនុស្សរណៈយោគយល់ (MoU) ដែលចុះហត្ថលេខាកាលពីថ្ងៃទី១៨ ខែមិថុនា។

យោធាអាមេរិកបានបើកការវាយប្រហារជាប់រាល់ថ្ងៃ ជិត២សប្តាហ៍ហើយ ប្រឆាំងប្រទេសអ៉ីរ៉ង់ ដោយអះអាងថា ដើម្បីបំផ្លាញ​សមត្ថភាពរបស់អ៉ីរ៉ង់ ក្នុងការគំរាមកំហែងកប៉ាល់ពាណិជ្ជកម្ម នៅច្រកសមុទ្រ Hormuz ហើយប្រធានាធិបតីអាមេរិក លោក ដូណាល់ ត្រាំ បានប្រកាសថា បទឈប់បាញ់ជាមួយអ៉ីរ៉ង់ បានឈានដល់ទីបញ្ចប់។ អ៉ីរ៉ង់បានឆ្លើយតបវិញ ដោយបាញ់មីស៉ីលនិងដ្រូនលើមូលដ្ឋានយោធាអាមេរិក នៅតាមបណ្តាប្រទេសក្នុងតំបន់ រួមមានដូចជាកូវ៉ែត បារ៉ែន និងហ៊្សកដានី ជាដើម។

គួរបញ្ជាក់ថា ការឡើងកម្តៅជាថ្មីក្នុងជម្លោះនៅមជ្ឈិមបូព៌ា គឺស្របពេលដែលភាគីទាំងពីរ នៅក្រោម MoU ត្រូវបន្តបើកកិច្ចចរចា ក្នុងរយៈពេល៦០ថ្ងៃ​ សំដៅឆ្ពោះទៅរកការសម្រេចឱ្យបាន កិច្ចព្រមព្រៀងគ្រប់ជ្រុងជ្រោយចុងក្រោយមួយ ដើម្បីបិទបញ្ចប់សង្រ្គាម​ជាផ្លូវការ៕