(ប៉ាឡេស្ទីន)៖ ចលនាប្រដាប់អាវុធប៉ាឡេស្ទីនហាម៉ាស បានតែងតាំងលោក Khalil Al-Hayya ជាមេដឹកនាំថ្មីរបស់ខ្លួន ខណៈអ្នកវិភាគមួយរូបបានលើកឡើងថា នេះអាចជាសញ្ញាបង្ហាញពីជំហរដ៏តឹងរ៉ឹងជាងមុនរបស់ក្រុមនេះ ចំពោះមុខការអំពាវនាវឱ្យរំសាយអាវុធ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី២១ ខែកក្កដា ឆ្នាំ២០២៦។

លោក Hayya ចូលមកជំនួសតំណែង លោក Yahya Sinwar អតីតមេដឹកនាំដែលត្រូវបានសម្លាប់ក្នុងការប្រយុទ្ធគ្នា ជាមួយកងកម្លាំងអ៉ីស្រាអែល អំឡុងខែតុលា ឆ្នាំ២០២៤ ជាពេលដែលក្រុមហាម៉ាសធ្វើសង្គ្រាមទ្រង់ទ្រាយធំ រយៈពេល ២ឆ្នាំជាមួយអ៉ីស្រាអែល នៅតំបន់ហ្កាហ្សា។

លោក Hayya ដែលជាប្រធានហាម៉ាសប្រចាំតំបន់ហ្កាហ្សា កំពុងរស់នៅនិរទេសខ្លួន និងជាអ្នកចរចាជាន់ខ្ពស់ម្នាក់ បានក្លាយជាតួអង្គកាន់តែសំខាន់នៅក្នុងជួរដឹកនាំក្រុមនេះ ចាប់តាំងពីការស្លាប់របស់លោក Sinwar និងអតីតមេដឹកនាំហាម៉ាសម្នាក់ទៀត គឺលោក Ismail Haniyeh។ លោកត្រូវបានគេមើលឃើញថា មានជំហររឹងរូសជាង លោក Khaled Meshaal ដែលជាប្រធានការិយាល័យរបស់ក្រុមនេះ នៅក្រៅប្រទេស និងជាបេក្ខជនឈានមុខគេម្នាក់ទៀត សម្រាប់តំណែងជាមេដឹកនាំ។

គួរបញ្ជាក់ថា ក្រុមហាម៉ាស កំពុងប្រឈមមុខផលប៉ះពាល់យ៉ាងខ្លាំងពីសង្គ្រាមរយៈពេលពីរឆ្នាំ ជាមួយអ៉ីស្រាអែល និងការទាមទារជាអន្តរជាតិឱ្យរំសាយអាវុធ៕