(វ៉ាស៉ីនតោន)៖ ប្រធានាធិបតីសហរដ្ឋអាមេរិក លោក ដូណាល់ ត្រាំ បានថ្លែងកាលពីថ្ងៃចន្ទថា នាយករដ្ឋមន្ត្រីអ៉ីស្រាអែល លោក បេនចាមីន ណេតាន់យ៉ាហ៊ូ នឹងមិនត្រូវបានចាប់ខ្លួនទេ នៅពេលលោកបំពេញទស្សនកិច្ច នៅសហរដ្ឋអាមេរិក បន្ទាប់ពីអភិបាលក្រុងញូវយ៉ក លោក Zohran Mamdani បាននិយាយថា លោកនៅតែពិចារណាលើចំណាត់ការនេះ។

លោក ត្រាំ បានសរសេរនៅក្នុងការបង្ហោះបណ្ដាញសង្គមមួយ ដែលមិនបានសំដៅចំផ្ទាល់លើ ការអត្ថាធិប្បាយរបស់លោកអភិបាលក្រុងថា «លោក បេនចាមីន ណេតាន់យ៉ាហ៊ូ នឹងមិនត្រូវបានចាប់ខ្លួន តាមមធ្យោបាយណាមួយឡើយ អំឡុងពេលដែលលោកស្ថិតនៅក្នុងសហរដ្ឋអាមេរិក»។

តុលាការព្រហ្មទណ្ឌអន្តរជាតិ (ICC) ដែលមានមូលដ្ឋាននៅទីក្រុងឡាអេ បានចេញដីកាចាប់ខ្លួនលោក ណេតាន់យ៉ាហ៊ូ កាលពីឆ្នាំ២០២៤ ពីបទចោទប្រកាន់ឧក្រិដ្ឋកម្មសង្គ្រាម អំឡុងសង្គ្រាមហ្កាហ្សា។ ប៉ុន្តែអ៉ីស្រាអែល ច្រានចោលយុត្តាធិការរបស់ ICC និងបដិសេធថាមិនបានប្រព្រឹត្តឧក្រិដ្ឋកម្មសង្គ្រាមណាមួយឡើយ។

លោក ត្រាំ មិនបានលើកឡើងចំពីលោក Mamdani នៅក្នុងការបង្ហោះសារលើបណ្តាញ Truth Social របស់លោកទេ ប៉ុន្តែបានសរសើរអ៉ីស្រាអែលដែលបានជួយក្នុងសង្គ្រាមអ៉ីរ៉ង់។ អភិបាលក្រុងញូវយ៉ក បាននិយាយនៅក្នុងបទសម្ភាសមួយ ដែលបានផ្សាយកាលពីថ្ងៃសៅរ៍ចុងសប្តាហ៍មុនថា នាយកដ្ឋានច្បាប់របស់ទីក្រុង កំពុងពិចារណាយ៉ាងសកម្ម អំពីអ្វីដែលច្បាប់អាចអនុញ្ញាត ពាក់ព័ន្ធជម្រើសនៃការចាប់ខ្លួនលោក ណេតាន់យ៉ាហ៊ូ។

លោក Mamdani បានប្រាប់កម្មវិធីផតខាសវីដេអូមួយរបស់កាសែត New York Times ដែលហៅថា «The Interview» ថា «ខ្ញុំជឿថាលោកនាយករដ្ឋមន្ត្រី ណេតាន់យ៉ាហ៊ូ គួរតែស្ថិតនៅទីក្រុងឡាអេ។ លោកគឺជាឧក្រិដ្ឋជនសង្គ្រាម ដែលត្រូវបានចោទប្រកាន់ ដោយតុលាការព្រហ្មទណ្ឌអន្តរជាតិ»។

គួរបញ្ជាក់ថា លោក ណេតាន់យ៉ាហ៊ូ តែងតែធ្វើដំណើរទៅកាន់ទីក្រុងញូវយ៉កជារៀងរាល់ខែកញ្ញា សម្រាប់ការចូលរួមកិច្ចប្រជុំប្រចាំឆ្នាំរបស់មេដឹកនាំពិភពលោក នៅមហាសន្និបាតអង្គការសហប្រជាជាតិ៕