(ឡុងដ៍)៖ លោក Andy Burnham បានក្លាយជានាយករដ្ឋមន្ត្រីថ្មីរបស់ចក្រភពអង់គ្លេស កាលពីថ្ងៃចន្ទ ទី២០ ខែកក្កដា ឆ្នាំ ២០២៦ ក្រោយនាយករដ្ឋមន្រ្តីចាំផ្ទះ លោក Keir Starmer បានចុះចេញពីតំណែងជាផ្លូវការ។

លោក Burnham បានក្លាយជានាយករដ្ឋមន្រ្តីអង់គ្លេសទី៧ ក្នុងរយៈពេលត្រឹមជាង១ទសវត្សរ៍ ចាប់តាំងពីចក្រភពអង់គ្លេស បានបោះឆ្នោតដកខ្លួនចេញពីសហភាពអឺរ៉ុប កាលពីខែមិថុនា ឆ្នាំ២០១៦។ លោក Starmer បានដឹកនាំគណបក្សកាន់អំណាច Labour Party ឱ្យទទួលជ័យជម្នះភ្លូកទឹកភ្លូកដី កាលពី២ឆ្នាំមុន។ ប៉ុន្តែប្រជាប្រិយភាពរបស់លោកបានធ្លាក់ចុះជាលំដាប់ ហើយ​ក្រោយពេលគណបក្ស Labour ទទួលបរាជ័យក្នុងការបោះឆ្នោតថ្នាក់មូលដ្ឋាន កាលពីខែឧសភា សមាជិកសភាកាន់តែច្រើន​ នៅក្នុងបក្សរបស់លោកផ្ទាល់ បាននាំគ្នាអំពាវនាវឱ្យលោកចុះចេញពីតំណែង។

លោក Starmer បានប្រកាសពីការសម្រេចចិត្តលាលែងពីតួនាទី ជាមេដឹកនាំគណបក្ស Labour កាលពីថ្ងៃទី២២ ខែមិថុនា ហើយលោក Burnham បានឡើងកាន់តួនាទីនេះ កាលពីសប្តាហ៍មុន។ នៅក្រោមប្រព័ន្ធសភា របស់ចក្រភពអង់គ្លេស គណបក្សកាន់អំណាចអាចផ្លាស់ប្តូរមេដឹកនាំរបស់ខ្លួនបាន ដែលជាអ្នកត្រូវមានមុខតំណែងជា នាយករដ្ឋមន្រ្តីផងដែរនោះ ដោយមិនចាំបាច់មានការបោះឆ្នោតសកលឡើយ។ ការបោះឆ្នោតសកលថ្មី មិនត្រូវបានរំពឹងថានឹងរៀបចំឡើងនោះទេ សម្រាប់រយៈពេលយ៉ាងហោច៣ឆ្នាំទៀត។

លោក Burnham ត្រូវបានបោះឆ្នោតជ្រើសរើសជាសមាជិកសភាសម្រាប់មណ្ឌល Leigh កាលពីខែមិថុនា ឆ្នាំ២០០១។ លោកបានបម្រើការងារក្នុងរដ្ឋាភិបាល ចាប់ពីចន្លោះឆ្នាំ ២០០៧ ដល់ឆ្នាំ២០១០ ក្នុងតំណែងជាអគ្គលេខាធិការក្រសួងហិរញ្ញវត្ថុ ជារដ្ឋមន្ត្រីក្រសួងវប្បធម៌ ប្រព័ន្ធផ្សព្វផ្សាយ និងកីឡា និងជារដ្ឋមន្ត្រីក្រសួងសុខាភិបាល។ ដោយឡែក ក្នុងអំឡុងពេលជាក្រុមប្រឆាំង លោកបានបម្រើការងារជារដ្ឋមន្ត្រីស្រមោលក្រសួងសុខាភិបាល រដ្ឋមន្ត្រីស្រមោលក្រសួងអប់រំ និងរដ្ឋមន្ត្រីស្រមោលក្រសួងមហាផ្ទៃ។

លោក Burnham ត្រូវបានបោះឆ្នោតជ្រើសរើសជាអភិបាលក្រុង Greater Manchester កាលពីខែឧសភា ឆ្នាំ ២០១៧ ហើយត្រូវបានបោះឆ្នោតឡើងវិញនៅឆ្នាំ២០២១ និងឆ្នាំ២០២៤។ ក្នុងនាមជាអភិបាលក្រុង លោកបាននាំបណ្ដាញរថយន្តក្រុង ត្រឡប់មកក្រោមការគ្រប់គ្រងសាធារណៈវិញ និងបានមើលការខុសត្រូវលើទីក្រុង Manchester ឲ្យក្លាយជាតំបន់ទីក្រុង ដែលមានការរីកចម្រើនលឿនបំផុតនៅចក្រភពអង់គ្លេស។

លោកបានត្រឡប់មកសភាវិញ ក្នុងនាមជាសមាជិកសភាសម្រាប់មណ្ឌល Makerfield កាលពីខែមិថុនា ឆ្នាំ ២០២៦ ហើយត្រូវបានបោះឆ្នោតជ្រើសរើសជាមេដឹកនាំគណបក្ស Labour ដែលជាបក្សកាន់អំណាចបច្ចុប្បន្ន នៅថ្ងៃទី១៦ ខែកក្កដា ឆ្នាំ ២០២៦ ជំនួសលោក Starmer។

គួរបញ្ជាក់ថា ពាក់ព័ន្ធជីវិតផ្ទាល់ខ្លួន លោក Andy Burnham ដែលមានវ័យ៥៦ឆ្នាំ បានរៀបការហើយមានកូនបីនាក់៕