(តូក្យូ)៖ នាថ្ងៃអង្គារ ទី២១ ខែកក្កដា ឆ្នាំ២០២៦ ទីក្រុងតូក្យូបានរាយការណ៍ថា កងទ័ពជើងទឹកចិននិងរុស្ស៊ី បានធ្វើសមយុទ្ធបាញ់គ្រាប់ពិតរួមគ្នា ដោយប្រើកាំភ្លើងយន្ត នៅក្នុងតំបន់សេដ្ឋកិច្ចផ្តាច់មុខ (EEZ) របស់ប្រទេសជប៉ុន កាលពីថ្ងៃអាទិត្យចុងសប្តាហ៍កន្លងទៅនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ទីក្រុងតូក្យូបានចាត់ទុកឧប្បត្តិហេតុនេះ ថាជាសញ្ញានៃការពង្រឹងកិច្ចសហប្រតិបត្តិការយោធារបស់ប្រទេសទាំងពីរ ហើយជាលើកដំបូង ដែលក្រសួងការពារជាតិជប៉ុនបានប្រទះឃើញ សមយុទ្ធបាញ់គ្រាប់ពិតរបស់ចិន នៅក្នុងតំបន់សេដ្ឋកិច្ចផ្តាច់មុខរបស់ខ្លួន។

សមយុទ្ធនេះបានកើតឡើងចម្ងាយ ១៨០គីឡូម៉ែត្រភាគនិរតីនៃកោះ Okinotori ដែលជាទឹកដីភាគខាងត្បូងបំផុតរបស់ជប៉ុន។ អ្នកនាំពាក្យរដ្ឋាភិបាលជប៉ុន លោក Minoru Kihara បានថ្លែងថា ជប៉ុនបានប្រាប់ទីក្រុងប៉េកាំង តាមរយៈបណ្តាញការទូតថា សមយុទ្ធនេះ «អាចបង្កគ្រោះថ្នាក់ដល់ការធ្វើនាវាចរណ៍របស់កប៉ាល់នានា ដែលនៅក្បែរនោះ»។

ជាការឆ្លើយតប ទីក្រុងតូក្យូ បានដាក់ពង្រាយកម្លាំងតាមផ្លូវអាកាសនិងផ្លូវសមុទ្រ ដើម្បីឃ្លាំមើលនិងត្រួតពិនិត្យស្ថានភាព ហើយនឹងបន្តតាមដានសកម្មភាពរបស់នាវាចិននិងរុស្ស៊ី នៅក្នុងដែនទឹកជុំវិញប្រទេសជប៉ុន។

គួរបញ្ជាក់ថា ឧប្បត្តិហេតុនេះ កើតឡើងបន្ទាប់ពីកងកម្លាំងទ័ពអាកាសចិននិងរុស្ស៊ី បានហោះហើរយន្តហោះទម្លាក់គ្រាប់បែករួមគ្នា លើដែនទឹកជុំវិញប្រទេសជប៉ុនកាលពីខែមុន និងក្រោយការប្រឈមមុខដាក់គ្នារវាងនាវាឆ្មាំសមុទ្រជប៉ុននិងចិន នៅជិតកោះដែលមានជម្លោះក្នុងខែនេះ៕