(កូឡុំបូ)៖ ទីភ្នាក់ងារសុខាភិបាលសាធារណៈរបស់ប្រទេសស្រីលង្កា និងមន្ទីរពេទ្យនានា កំពុងប្រយុទ្ធប្រឆាំងនឹង ការផ្ទុះជំងឺគ្រុនឈាមដ៏អាក្រក់បំផុត ក្នុងរយៈពេលជិតមួយទសវត្សរ៍ ហើយកំពុងងាកទៅរកកងកម្លាំងប្រដាប់អាវុធ ឱ្យជួយទប់ស្កាត់ការរីករាលដាល។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី២១ ខែកក្កដា ឆ្នាំ២០២៦។

កិច្ចប្រឹងប្រែងមានចាប់ពីការប្រើប្រាស់ដ្រូនរបស់កងទ័ពអាកាស ដើម្បីតាមដានស្ថានភាពទឹកដក់លើដំបូលផ្ទះ ក្រោយពេលភ្លៀងធ្លាក់រួច រហូតដល់ឱ្យមន្ត្រីយោធា និងនគរបាលចុះត្រួតពិនិត្យតាមលំនៅដ្ឋាន ការដ្ឋានសំណង់ និងសាលារៀន ក្នុងយុទ្ធនាការលុបបំបាត់ទីតាំងបង្កាត់ពូជសត្វមូស។

ចាប់តាំងពីផ្ទុះឡើង កាលពីខែមករា អ្នកស្លាប់ដោយសារជំងឺគ្រុនឈាមដែលចម្លងដោយសត្វមូសខ្លា កើនដល់ ៥៣នាក់ និងឆ្លង ៧៦ ០៤៤នាក់។ ចំនួនអ្នករងគ្រោះដោយសារវីរុសគ្រុនឈាមបំប្លែងថ្មី កំពុងខិតជិតដល់តួលេខជាង ១០០ ០០០នាក់ ដែលធ្លាប់កើតមានក្នុងឆ្នាំ២០១៧។

«វាជាការប្រឈមសម្រាប់ក្រុមគ្រូពេទ្យ ដោយសារតែចំនួនអ្នកជំងឺ កើនឡើងយ៉ាងឆាប់រហ័ស»។ នេះបើតាម លោក Lalindra Dias ទីប្រឹក្សាក្រុង Negombo ដែលជាទីតាំងមួយក្នុងចំណោមតំបន់រងគ្រោះខ្លាំងបំផុត ចម្ងាយប្រហែល ៣៥គីឡូម៉ែត្រ ភាគខាងជើងរដ្ឋធានី Colombo។ លោកបន្ថែមថា មន្ទីរពេទ្យស្រុក បានព្យាបាលអ្នកជំងឺជិត ១ ៨០០នាក់ ក្នុងរយៈពេលតិចជាងពីរខែ ចាប់តាំងពីខែមិថុនាមក។

អាជ្ញាធរសុខាភិបាលស្រីលង្កា បានឱ្យដឹងថា មន្ទីរពេទ្យកំពុងបន្ថែមគ្រែអ្នកជំងឺ ហើយក្រុមគ្រូពេទ្យ និងគិលានុបដ្ឋាក ត្រូវថែមម៉ោងធ្វើការ ដើម្បីព្យាបាលអ្នកឆ្លងច្រើនជាង ១៨ ០០០នាក់ ដែលបានកើនឡើង ក្នុងរយៈពេលពីរ​សប្តាហ៍ដំបូងនៃខែកក្កដា។ នៅក្នុងខែមិថុនា អ្នកឆ្លងជំងឺគ្រុនឈាមសរុបមានចំនួន ២១ ៥៣៧នាក់ ដែលជាធម្មតាចេញរោគសញ្ញាគ្រុនក្ដៅខ្លាំង ឈឺចាប់រាង្គកាយ និងបាត់ចំណង់អាហារ។ ស្រីលង្កា មិនទាន់ណែនាំនូវវ៉ាក់សាំងការពារនៅឡើយទេ៕