(Ontario)៖ គិតត្រឹមថ្ងៃចន្ទសប្តាហ៍នេះ ភ្លើងឆេះព្រៃទូទាំងខេត្ត Ontario ប្រទេសកាណាដា បានរាលដាលលើផ្ទៃដី ៧៣៥ ០០០ហិកតាហើយ ខណៈគុណភាពខ្យល់ប្រសើរឡើងវិញភាគច្រើននៅក្នុងខេត្តនេះ ប៉ុន្តែនៅតែមានគុណភាពមិនល្អ សម្រាប់តំបន់ខ្លះនៃភាគកណ្តាលសហរដ្ឋអាមេរិក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី២១ ខែកក្កដា ឆ្នាំ២០២៦។

អភិបាលខេត្ត Ontario លោក Doug Ford បាននិយាយថា ខេត្ត​កំពុង​ប្រយុទ្ធ​នឹង​ភ្លើង​ឆេះ​យ៉ាង​សកម្ម​ចំនួន ១៩០កន្លែង ហើយ​ប្រជាជន​ប្រមាណ ១ ៨០០នាក់​ត្រូវ​បាន​ជម្លៀស​ចេញ​ពី​សហគមន៍​មាន​ប្រជាជន​តិច ​នៅឯ​ភាគ​ពាយ័ព្យ​។

ផ្សែងក្រាស់ ហុយចេញពីភ្លើងឆេះព្រៃនៅភាគខាងជើង និងខាងលិចខេត្ត Ontario ក៏ដូចភាគខាងជើងរដ្ឋ Minnesota សហរដ្ឋអាមេរិក ធ្វើឱ្យគុណភាពខ្យល់ក្នុងទីក្រុង Toronto របស់កាណាដា កាលពីសប្តាហ៍មុន ក្លាយជាអាក្រក់បំផុតលើពិភពលោក ហើយរាលដាលបន្តទៅដល់ទីក្រុងញូវយ៉ក និងទីក្រុងវ៉ាស៉ីនតោន របស់សហរដ្ឋអាមេរិក។

បញ្ហាគុណភាពខ្យល់ ដែលបណ្តាលមកពីផ្សែងនៃភ្លើងឆេះព្រៃនៅកាណាដា បានបង្កឱ្យមានភាពតានតឹង ជាមួយសហរដ្ឋអាមេរិក។ នារសៀលថ្ងៃចន្ទ (ម៉ោងក្នុងតំបន់) គេហទំព័រ AirNow របស់ទីភ្នាក់ងារការពារបរិស្ថានអាមេរិក បានវាយតម្លៃគុណភាពខ្យល់ថានៅតែមិនល្អ ក្នុងតំបន់មួយចំនួន ដែលគ្របដណ្តប់លើផ្នែកខ្លះនៃរដ្ឋ Wisconsin, Iowa, Missouri, Illinois, Indiana, Ohio និង Michigan៕