(ហ្សាកាតា)៖ រដ្ឋាភិបាលឥណ្ឌូណេស៊ី បានសម្រេចកាត់បន្ថយថវិកាសម្រាប់កម្មវិធីផ្តល់អាហារសាលាដោយឥតគិតថ្លៃរបស់ប្រធានាធិបតី ប្រាបូវ៉ូ ស៊ូប៊ីយ៉ាន់តូ មកនៅត្រឹម ២២៩ទ្រីលានរូពៀ (ប្រមាណ ១២,៨១ពាន់លានដុល្លារអាមេរិក) ធ្លាក់ចុះពី ២៦៨ទ្រីលានរូពៀ ហើយអាចនឹងបន្តកាត់បន្ថយថែមទៀត។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

កម្មវិធីនេះគឺជាការសន្យាបោះឆ្នោតដ៏សំខាន់ និងមានតម្លៃថ្លៃបំផុតរបស់លោក ប្រាបូវ៉ូ។ ដើមឡើយ រដ្ឋាភិបាលគ្រោងចំណាយថវិកាដល់ទៅ ៣៣៥ទ្រីលានរូពៀ ក្នុងឆ្នាំ២០២៦ សម្រាប់គោលដៅអ្នកទទួលផល ៨៣លាននាក់។ ប៉ុន្តែថ្មីៗនេះ ថវិកានេះត្រូវបានកាត់បន្ថយជាបន្តបន្ទាប់ ដើម្បីសន្សំសំចៃ និងបង្កើនប្រសិទ្ធភាព។ លេខាធិការទីភ្នាក់ងារអាហារូបត្ថម្ភជាតិ (NNA) បានបញ្ជាក់ថា ប្រធានាធិបតីបានទុកពេលមួយខែ ដើម្បីកំណត់តួលេខថវិកាចុងក្រោយ។

ដោយឡែក​ អនុប្រធានទីភ្នាក់ងារ NNA បានសង្កត់ធ្ងន់ថា «ចំនួនអ្នកទទួលផលនឹងត្រូវកាត់បន្ថយ។ លោកប្រធានាធិបតីលែងខ្វល់ពីចំនួនមនុស្សទៀតហើយ ប៉ុន្តែលោកចង់ផ្តោតលើការកែលម្អគុណភាពវិញ ដើម្បីកុំឱ្យមានករណីពុលអាហារកើតឡើងទៀត»។

គួររំលឹកថា កម្មវិធីដែលបានចាប់ផ្តើមតាំងពីខែមករា ឆ្នាំ២០២៥ នេះ តែងតែជួបបញ្ហាភស្តុភារ និងមានករណីពុលអាហារជាច្រើនលើក។ បន្ថែមពីនេះ កាលពីខែមុន អតីតប្រធានទីភ្នាក់ងារអាហារូបត្ថម្ភនេះ រួមជាមួយមន្ត្រីពីររូបផ្សេងទៀត ក៏ទើបតែត្រូវបានចាប់ខ្លួនជុំវិញការចោទប្រកាន់ពីបទពុករលួយផងដែរ៕