(ឌូបៃ)៖ កងកម្លាំងសហរដ្ឋអាមេរិក បានទម្លាក់គ្រាប់បែកលើភាគខាងត្បូង និងខាងលិចប្រទេសអ៊ីរ៉ង់ ក្រោយលោក ដូណាល់ ត្រាំ ព្រមានថាទីក្រុងតេហេរ៉ង់ នឹងត្រូវបង់ខាតយ៉ាងធ្ងន់ធ្ងរចំពោះការស្លាប់របស់ទាហានអាមេរិក។ ជាការឆ្លើយតប នៅថ្ងៃអង្គារ អ៊ីរ៉ង់បានវាយប្រហារលើទីតាំងអាមេរិកនៅបារ៉ែន កូវ៉ែត និងហ្សកដានី ខណៈនាវាដឹកប្រេងមួយគ្រឿងទៀតក៏រងការវាយប្រហារនៅច្រកសមុទ្រហ័រមូសផងដែរ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ការប៉ះទង្គិចគ្នានេះ កើតឡើងត្រឹមតែមួយថ្ងៃបន្ទាប់ពីក្រុមហ៊ូទីនៅយេម៉ែន ដែលគាំទ្រដោយអ៊ីរ៉ង់ បានប្រកាសបិទខ្ទប់ផ្លូវសមុទ្រប្រឆាំងនឹងអារ៉ាប៊ីសាអូឌីត ដោយព្រមានថានាវាដែលចេញចូលកំពង់ផែអារ៉ាប៊ីសាអូឌីត នឹងក្លាយជាគោលដៅវាយប្រហារនៅគ្រប់ទីកន្លែង ដែលនេះជាការគំរាមកំហែងដល់ការផ្គត់ផ្គង់ថាមពលសកលយ៉ាងធ្ងន់ធ្ងរ។

បញ្ជាការដ្ឋានកណ្តាលអាមេរិក (Centcom) បានបញ្ជាក់ថា ខ្លួនបានវាយកម្ទេចមជ្ឈមណ្ឌលបញ្ជាការយោធា ទីតាំងបាញ់មីស៊ីលនិងដ្រូន និងប្រព័ន្ធការពារដែនអាកាសរបស់អ៊ីរ៉ង់។ ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ពីសំឡេងផ្ទុះនៅជុំវិញទីក្រុង Shiraz, Konarak, Chabahar និងទីតាំងជាច្រើនទៀតនៅភាគខាងត្បូង និងខាងលិច។

គួរបញ្ជាក់ថា​ ទោះបីជាការវាយប្រហារគ្នានេះ បានបំផ្លាញកិច្ចព្រមព្រៀងសន្តិភាពបណ្តោះអាសន្នស្ទើរតែទាំងស្រុងក្តី ប៉ុន្តែសញ្ញាដែលបង្ហាញថាភាគីទាំងពីរនៅតែចង់បន្តការចរចា បានជួយទប់តម្លៃប្រេងមិនឱ្យហក់ឡើងខ្លាំងនោះទេ។ ស្របពេលជាមួយគ្នានេះ ក្រសួងការបរទេសអាមេរិក ក៏បានចេញ «ការព្រមានសកល» ដល់ពលរដ្ឋអាមេរិកទាំងអស់ ដោយសារតែភាពតានតឹងកាន់តែខ្លាំងនៅមជ្ឈិមបូព៌ា៕