(ម៉ាឌ្រីដ)៖ កងពន្លត់អគ្គិភ័យអេស្ប៉ាញ កំពុងប្រឹងប្រែងគ្រប់គ្រងភ្លើងឆេះព្រៃដ៏ធំបំផុតប្រចាំឆ្នាំ ខណៈដែលអ្នកពន្លត់អគ្គិភ័យបារាំង ២នាក់ បានបាត់បង់ជីវិតក្នុងពេលបំពេញបេសកកម្ម។ ហេតុការណ៍ទាំងនេះកើតឡើងស្របពេលដែលទ្វីបអឺរ៉ុបកំពុងរងគ្រោះដោយរលកកម្តៅ គ្រោះរាំងស្ងួត និងការព្យាករណ៍ពីព្យុះព្រិលទឹកកកយ៉ាងធ្ងន់ធ្ងរនៅតំបន់បាល់កង់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នៅប្រទេសបារាំង អ្នកពន្លត់អគ្គិភ័យ ២នាក់បានស្លាប់នៅតំបន់ ហ្ស៊ីរ៉ុង (Gironde) ដែលជាតំបន់ប្រកាសអាសន្នខ្ពស់សម្រាប់ភ្លើងឆេះព្រៃ ត្រឹមតែពីរសប្តាហ៍ប៉ុណ្ណោះ បន្ទាប់ពីមន្ត្រីម្នាក់ទៀតបានស្លាប់នៅតំបន់ភ្នំអាល់។ ចំណែកនៅប្រទេសអេស្ប៉ាញ ភ្លើងឆេះព្រៃនៅខេត្តក្វាដាឡាហ្សារ៉ា (Guadalajara) បានឆាបឆេះយ៉ាងសន្ធោសន្ធៅមិនអាចគ្រប់គ្រងបានអស់ ៦ថ្ងៃមកហើយ ដែលបង្ខំឱ្យពលរដ្ឋជាង ១,២០០នាក់ត្រូវជម្លៀសខ្លួនចេញ ខណៈសីតុណ្ហភាពហក់ឡើងដល់ជាង ៤០អង្សាសេ។ គ្រោះថ្នាក់នេះកើតឡើងមិនដល់ពីរសប្តាហ៍ផង បន្ទាប់ពីភ្លើងឆេះព្រៃបានសម្លាប់មនុស្ស ១៣នាក់ នៅខេត្តអាល់មេរៀ (Almeria)។

គួរបញ្ជាក់ថា អឺរ៉ុបគឺជាទ្វីបដែលមានការឡើងកម្តៅលឿនជាងគេបំផុតនៅលើពិភពលោក។ អ្នកវិទ្យាសាស្ត្រជាច្រើនអះអាងថា ការប្រែប្រួលអាកាសធាតុដែលបង្កឡើងដោយមនុស្ស កំពុងធ្វើឱ្យរលកកម្តៅ គ្រោះរាំងស្ងួត និងភ្លើងឆេះព្រៃ កាន់តែមានសភាពធ្ងន់ធ្ងរ ព្រមទាំងបង្កើតលក្ខខណ្ឌអំណោយផលដល់ការកើតមានព្យុះដ៏បំផ្លិចបំផ្លាញភ្លាមៗ។ គិតមកទល់ពេលនេះក្នុងឆ្នាំ២០២៦ អឺរ៉ុបបានរងគ្រោះដោយរលកកម្តៅយ៉ាងអាក្រក់ចំនួន ៣ដងជាប់ៗគ្នារួចមកហើយ ដែលកម្តៅដ៏សាហាវនេះក៏ត្រូវបានគេបន្ទោសថាជាមូលហេតុនៃការស្លាប់របស់មនុស្សរាប់ពាន់នាក់នៅចន្លោះខែឧសភា ដល់ខែមិថុនា ផងដែរ៕