(វ៉ាស៊ីនតោន)៖ រដ្ឋមន្ត្រីការពារជាតិអាមេរិក លោក Pete Hegseth បាននិយាយនៅថ្ងៃអង្គារ ទី២១ ខែកក្កដា ឆ្នាំ២០២៦ ថាការចំណាយរបស់សហរដ្ឋអាមេរិកលើការធ្វើសង្រ្គាមជាមួយអ៉ីរ៉ង់ បានកើនដល់ ៣៧,៥ពាន់លានដុល្លារហើយមកទល់នឹងពេលនេះ ខណៈរូបលោកប្រឈមមុខនឹងការសួរចម្លើយដោយផ្ទាល់ពីក្រុមអ្នកតំណាងរាស្ត្រជាលើកដំបូងចាប់តាំងពីសង្រ្គាមអ៉ីរ៉ង់ផ្ទុះឡើងវិញជាថ្មី។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

សល់ពេល ៦ខែទៀត មុននឹងការបោះឆ្នោតពាក់កណ្ដាលអាណត្តិចូលមកដល់នៅខែវិច្ឆិកាខាងមុខ គណបក្សសាធារណរដ្ឋរបស់លោកប្រធានាធិបតី ដូណាល់ ត្រាំ ប្រហែលជាត្រូវប្រឈមនឹងឧបសគ្គកាន់តែខ្លាំងដើម្បីរក្សាការគ្រប់គ្រងសភាតំណាងរាស្ត្រ និងព្រឹទ្ធសភា នៅក្នុងសំឡេងភាគច្រើន ខណៈគណបក្សប្រជាធិបតេយ្យកំពុងកើនប្រជាប្រិយភាពក្នុងការស្ទង់មតិ ដ្បិតពួកគេបានទាញភ្ជាប់សង្រ្គាមអ៉ីរ៉ង់ទៅនឹងបញ្ហាសេដ្ឋកិច្ចប្រជាជនអាមេរិកកំពុងប្រឈម។

នៅក្នុងការផ្ដល់សក្ខីកម្មក្នុងទីក្រុងវ៉ាស៊ីនតោន នៅចំពោះមុខក្រុមអ្នកតំណាងរាស្ត្រអាមេរិក លោក Hegseth បានបញ្ជាក់ថាការចំណាយអស់ជាង ៣៧,៥ពាន់លានដុល្លារ ក្នុងនោះរួមមានទាំងការចំណាយជាក់លាក់មួយចំនួនក្នុងសង្រ្គាម ព្រមទាំងការប៉ាន់ស្មានការចំណាយរហូតដល់ថ្ងៃទី៣០ ខែកញ្ញា។ វាមិនទាន់ច្បាស់ថាតើមន្ទីរបញ្ចកោណបានគណនាលើការចំណាយយ៉ាងដូចម្ដេច នោះទេ? ប៉ុន្តែប្រភពមួយធ្លាប់បានប្រាប់ទីភ្នាក់ងារសារព័ត៌មាន Reuters កាលខែមីនា ថារដ្ឋបាលលោក ត្រាំ វាយតម្លៃថា៦ថ្ងៃដំបូងនៃសង្រ្គាម សហរដ្ឋអាមេរិកបានចំណាយអស់យ៉ាងហោច ១១,៣ពាន់លានដុល្លារ។

គួរបញ្ជាក់ថា លោក ត្រាំ កាលពីខែមិថុនា បានស្នើឱ្យសភាអាមេរិកអនុម័តកញ្ចប់ថវិកាជិត ៩០ពាន់លានដុល្លារបន្ថែមទៀត ដែលភាគច្រើននៃកញ្ចប់ថវិកានេះត្រូវយកទៅប្រើពាក់ព័ន្ធនឹងសង្រ្គាមជាមួយអ៉ីរ៉ង់៕