(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី នៅថ្ងៃអង្គារ ទី២១ ខែកក្កដា ឆ្នាំ២០២៦ បានប្រកាសពីការបណ្ដេញអគ្គមេបញ្ជាការកងទ័ពអ៊ុយក្រែន លោក Oleksandr Syrsky ចេញពីតំណែង នៅចំពោះមុខវិបត្តិនយោបាយដែលកំពុងកើតឡើងដោយសារតែបណ្ដេញរដ្ឋមន្ត្រីការពារជាតិដ៏មានប្រជាប្រិយភាពម្នាក់ចេញពីតំណែង។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ជាមួយការប្រកាសបណ្ដេញលោក​ Syrsky លោក ហ្សេលេនស្គី ក៏បានប្រកាសតែងតាំងមេបញ្ជាការកងកម្លាំងចម្រុះអ៊ុយក្រែន លោក Mykhailo Drapaty ជាអគ្គមេបញ្ជាការថ្មីរបស់អ៊ុយក្រែនផងដែរ។ លោក Syrsky មានអាយុ ៦០ឆ្នាំ បានឡើងកាន់តំណែងជាអគ្គមេបញ្ជាការកងទ័ពអ៊ុយក្រែនចាប់តាំងពីឆ្នាំ២០២៤ ហើយស្ថិតក្នុងចំណោម មេបញ្ជាការដ៏មានបទពិសោធន៍ឆ្អិនឆ្អៅរបស់អ៊ុយក្រែនដែលបានដឹកនាំប្រតិបត្តិការយោធាប្រឆាំងនឹងការឈ្លានពានពីរុស្ស៉ីដែលបានផ្ទុះឡើងកាលពីឆ្នាំ២០២២។

ការបណ្ដេញលោក Syrsky ចេញពីតំណែងទៀតសោត ធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីមានបាតុកម្មតវ៉ាប្រឆាំងនឹងការសម្រេចចិត្តរបស់លោក ហ្សេលេនស្គីដែលបានដកតំណែង រដ្ឋមន្ត្រីការពារជាតិ លោក Mykhailo Fedorov ដែលមានទំនាស់ជាមួយលោក Syrsky ជុំវិញការធ្វើកំណែទម្រង់យោធា។ «ខ្ញុំបានសម្រេចចិត្តតែងតាំងលោក Mykhailo Drapaty ជាអគ្គមេបញ្ជាការថ្មីនៃកងកម្លាំងប្រដាប់អាវុធអ៊ុយក្រែន»។ នេះជាការគូសបញ្ជាក់របស់លោក ហ្សេលេនស្គី ក្នុងការបង្ហោះមួយលើបណ្ដាញទំនាក់ទំនងសង្គម Telegram។ លោកបានបន្ថែមថាលោកពិតជាអរគុណលោក Oleksandr Syrsky និងកងទ័ពអ៊ុយក្រែនទាំងអស់ដែលកំពុងប្រយុទ្ធតស៊ូការពារជាតិ។

គួរបញ្ជាក់ថា ជោគវាសនារបស់លោក Syrsky បានស្ថិតក្នុងភាពមិនច្បាស់លាស់កាលពីសប្ដាហ៍មុន នៅពេលលោក ហ្សេលេនស្គីដកតំណែងរដ្ឋមន្ត្រីការពារជាតិ លោក Fedorov តែ៦ខែ ប៉ុណ្ណោះការតែងតាំងរូបលោក។ លោក Fedorov បានចោទប្រកាន់លោក Syrsky បានរារាំងគំនិតរបស់លោកក្នុងការធ្វើកំណែទម្រង់យោធាអ៊ុយក្រែន ហើយបានបញ្ចុះបញ្ចូលឱ្យលោក ហ្សេលេនស្គីបណ្ដេញរូបលោកចេញពីតំណែង។ តែលោក Syrsky បានច្រានចោលការចោទប្រកាន់បែបនេះ៕