(បែរឡាំង)៖ ប្រធានាធិបតីអាស៊ែបៃហ្សង់ លោក Ilham Aliyev បានឱ្យដឹងកាលពីថ្ងៃអង្គារ ទី២១ ខែកក្កដា ឆ្នាំ២០២៦ ថាអតីតមន្ត្រីជាន់ខ្ពស់អាល្លឺម៉ង់ និងរុស្ស៉ីបានបើកកិច្ចប្រជុំជាសម្ងាត់ ក្នុងរដ្ឋធានីបាគូ ក្នុងខែកក្កដានេះ ដើម្បីពិភាក្សាគ្នាថាតើត្រូវបិទបញ្ចប់សង្រ្គាមរបស់រុស្ស៉ីប្រឆាំងអ៊ុយក្រែនដោយរបៀបណា។ នេះបើតាមការចេញផ្សាយដោយសារព័ត៌មាន Bloomberg។

ការលើកឡើងរបស់លោក Ilham Aliyev ជាការទទួលស្គាល់សេចក្ដីរាយការណ៍របស់ប្រព័ន្ធផ្សព្វផ្សាយអាល្លឺម៉ង់ដែលបានចុះផ្សាយពីកិច្ចប្រជុំសម្ងាត់នេះកាលពីពេលថ្មីៗនេះ។ ថ្លែងប្រាប់ក្រុមអ្នកសារព័ត៌មានក្នុងទីក្រុងបែរឡាំង កាលពីថ្ងៃអង្គារអំឡុងធ្វើសន្និសីទសារព័ត៌មានរួមគ្នាជាមួយអធិការបតីអាល្លឺម៉ង់ លោក Friedrich Merz លោក Aliyev បានគូសបញ្ជាក់ថា «ទឹកដីរបស់យើងត្រូវបានប្រើដើម្បីរៀបចំកិច្ចប្រជុំរបៀបនេះដោយយើងមិនបានដឹងជាមុននោះទេ»។ លោកបន្ថែមថាអាស៊ែបៃហ្សង់មិនទាន់ផ្ដល់ព័ត៌មានអ្វីលម្អិតទេ ដ្បិតមិនមានវត្តមានចូលក្នុងកិច្ចប្រជុំសម្ងាត់នោះ។ ប៉ុន្តែលោក អះអាងថាប្រសិនបើកិច្ចប្រជុំនោះមានគោលបំណងចូលរួមចំណែងដល់ការស្វែងរកដំណោះស្រាយបិទបញ្ចប់សង្រ្គាមរវាងរុស្ស៉ី និងអ៊ុយក្រែន នោះអាស៊ែបៃហ្សង់នឹងស្វាគមន៍ជានិច្ច។

តាមលោក Aliyev កិច្ចប្រជុំសម្ងាត់រវាងអតីតក្រុមមន្ត្រីជាន់ខ្ពស់អាល្លឺម៉ង់ និងរុស្ស៉ីបានធ្វើឡើងក្នុងរដ្ឋធានីបាគូកាលពីថ្ងៃទី១២ ដល់ថ្ងៃទី១៤ ខែកក្កដា។ ដោយឡែក បើតាមប្រព័ន្ធផ្សព្វផ្សាយអាល្លឺម៉ង់វិញ គណៈប្រតិភូក្រៅផ្លូវការរបស់អាល្លឺម៉ង់ ក្នុងនោះរួមមានលោក Ronald Pofalla និងលោក Matthias Platzeck ដែលសុទ្ធសឹងជាអតីតមន្ត្រីជាន់ខ្ពស់អាល្លឺម៉ង់ក្រោមការដឹកនាំរបស់អតីតអធិការបតីអាល្លឺម៉ង់ លោកស្រី Angela Merkel។ ចំណែកខាងរុស្ស៉ីវិញ មានអតីតនាយករដ្ឋមន្ត្រីរុស្ស៉ី លោក Viktor Zubkov និងបច្ចុប្បន្នជាប្រធានក្រុមប្រឹក្សាភិបាលក្រុមហ៊ុន Gazprom៕