(ការ៉ាកាស)៖ របាយការណ៍ផ្លូវការចុងក្រោយ កាលពីថ្ងៃអង្គារ ទី២១ ខែកក្កដា ឆ្នាំ២០២៦ បានបង្ហាញថា ចំនួនអ្នកស្លាប់ដោយសារគ្រោះរញ្ជួយដីភ្លោះ ដែលបានវាយប្រហារប្រទេសវ៉េណេស៊ុយអេឡាកាលពីជិតមួយខែមុន នៅតែបន្តកើនឡើង គឺដល់ចំនួន៥៣៤៦នាក់។ នចំនួនអ្នកស្លាប់ដោយសារគ្រោះរញ្ជួយដីភ្លោះ នៅវ៉េណេស៊ុយអេឡាឡើងដល់ ៥.៣៤៦ នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

គ្រោះរញ្ជួយដី២ផ្ទួនគ្នា កម្រិត៧,២រ៉ិចទ័រ និង៧,៥រ៉ិចទ័រ កាលពីថ្ងៃទី ២៤ ខែមិថុនា បានវាយប្រហារយ៉ាងខ្លាំងបំផុត នៅភាគខាងជើងនៃប្រទេសវ៉េណេស៊ុយអេឡា ជាពិសេសនៅរដ្ឋជាប់ឆ្នេរសមុទ្រ La Guaira ដែលស្ថិតនៅជាប់រដ្ឋធានីការ៉ាកាស។

លោក Jorge Rodriguez ប្រធានរដ្ឋសភាវ៉េណេស៊ុយអេឡា បានប្រកាសនៅលើបណ្តាញ Telegram ថា ចំនួនអ្នកស្លាប់គឺមានយ៉ាងហោច ៥៣៤៦នាក់ ដែលជាការកើនឡើង ៦៨នាក់ ធៀបនឹងមួយថ្ងៃមុន។ ដោយឡែក ចំនួនអ្នករងរបួសនៅ ១៦ ៧៤០នាក់ដដែល។ រដ្ឋាភិបាលវ៉េណេស៊ុយអេឡា មិនបានបញ្ជាក់ពីចំនួនអ្នកបាត់ខ្លួន ដែលនៅជាប់ក្រោមគំនរបាក់បែកនោះទេ ប៉ុន្តែអង្គការសហប្រជាជាតិ បានប៉ាន់ប្រមាណថា មនុស្សរហូតដល់ ៥០០០០នាក់ អាចនៅតែបាត់ខ្លួន។

មនុស្សសរុបជាង ២៣០០០នាក់ ត្រូវព្រាត់ប្រាសពីផ្ទះសម្បែង ព្រោះតែគ្រោះរញ្ជួយដី ហើយមានការរៀបចំជំរំស្នាក់នៅបណ្តោះអាសន្ន នៅទូទាំងតំបន់រងគ្រោះ រាប់ចាប់ពីកីឡដ្ឋាន រហូតដល់ចិញ្ចើមផ្លូវ។ លោកស្រី Delcy Rodriguez ប្រធានាធិបតីស្តីទីវ៉េណេស៊ុយអេឡា កាលពីថ្ងៃចន្ទ បានប្រកាសថា ប្រជាជនប្រមាណ ២០០គ្រួសារ ដែលបាត់បង់ផ្ទះសម្បែង នឹងត្រូវបានផ្ដល់កន្លែងស្នាក់នៅ ក្នុងអគារអាផាតមិនមួយនៅទីក្រុងការ៉ាកាស ហើយលោកស្រីសន្យាសាងសង់ ផ្ទះជាង ៤០០០ ខ្នង ដើម្បីជួយអ្នករងផលប៉ះពាល់។

គួរបញ្ជាក់ថា យោងតាមតួលេខផ្លូវការពីរដ្ឋាភិបាលវ៉េណេស៊ុយអេឡា អគារសរុបជាង ៨៥០ខ្នងបានរងការខូចខាត ហើយ ១៩០ខ្នង បានដួលរលំទាំងស្រុង ដោយសារគ្រោះមហន្តរាយរញ្ជួយដី៕