(ញូវដែលី)៖ តុលាការនៅប្រទេសឥណ្ឌា បានកាត់ទោសជនជាតិសូម៉ាលីចំនួន៤៤នាក់ ដាក់ពន្ធនាគារអស់មួយជីវិត បន្ទាប់ពីពួកគេបានធ្វើសកម្មភាពប្លន់កប៉ាល់ នៅក្បែរឆ្នេរប្រទេសនៃតំបន់អាហ្រ្វិកខាងកើតមួយនេះ កាលពីប៉ុន្មានឆ្នាំមុន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃពុធ ទី២២ ខែកក្កដា ឆ្នាំ២០២៦។

ក្នុងឧប្បត្តិហេតុពីរផ្សេងគ្នា ពួកចោរសមុទ្របានប្លន់កប៉ាល់ដឹកទំនិញធំមួយគ្រឿង និងកប៉ាល់នេសាទមួយគ្រឿង ដោយបានចាប់ក្រុមនាវិកជាចំណាប់ខ្មាំង មុនពេលកងទ័ពជើងទឹកឥណ្ឌា បានជួយសង្គ្រោះពួកគេ និងចាប់ខ្លួនចោរសមុទ្រទាំងនោះ កាលពីឆ្នាំ២០២៤។

បើយោងតាមសាលក្រម ក្នុងសំណុំរឿងទាំងពីរ ដែលត្រូវបានប្រកាសដោយតុលាការពិសេសមួយនៅទីក្រុងបុមបៃ កាលពីថ្ងៃចន្ទដើមសប្តាហ៍នេះ ក្នុងអំឡុងពេលជំនុំជម្រះក្ដី ជនជាប់ចោទសូម៉ាលីទាំង៤៤នាក់ បានឆ្លើយសារភាពកំហុស។ ចៅក្រមឈ្មោះ SB Dige បាននិយាយថា «ការធ្វើសកម្មភាពចោរសមុទ្រ តាមរយៈការប្លន់កប៉ាល់ ហើយចាប់ក្រុមនាវិកជាចំណាប់ខ្មាំង ដើម្បីជំរិតទារប្រាក់ ដោយព្យាយាមសម្លាប់ពួកគេ និងយកពួកគេធ្វើជាខែលការពារខ្លួន គឺជារឿងយ៉ាងធ្ងន់ធ្ងរ ដែលមិនអាចមើលរំលងបានឡើយ»។

អំឡុងសកម្មភាពប្លន់លើកទីមួយ កាលពីខែធ្នូ ឆ្នាំ២០២៣ គឺជនជាតិសូម៉ាលី៣៥ នាក់ បានវាយប្រហារកប៉ាល់ដឹកទំនិញយក្ស ឈ្មោះ MV Ruen ដែលដោតទង់ជាតិម៉ាល់ត៍។ រិឯនៅខែមីនា ឆ្នាំ២០២៤ ជន៩នាក់ផ្សេងទៀត បានប្លន់កប៉ាល់នេសាទ Al Kambar ដែលដោតទង់ជាតិអ៉ីរ៉ង់។ ចោរសមុទ្រសរុបទាំង៤៤នាក់ ត្រូវបានឃុំខ្លួននៅពន្ធនាគារ Taloja ក្នុងទីក្រុង Navi Mumbai តាំងពីឆ្នាំ២០២៤។ កន្លងមក ពួកគេបានដាក់ញត្តិទៅតុលាការ ដើម្បីសុំបញ្ជូនត្រឡប់ទៅប្រទេសសូម៉ាលីវិញ ដើម្បីប្រឈមមុខនឹងនីតិវិធីច្បាប់នៅទីនោះ។

សកម្មភាពចោរសមុទ្រ បានរីករាលដាលយ៉ាងខ្លាំង នៅក្បែរឆ្នេរសមុទ្រសូម៉ាលី កាលពីអំឡុងទសវត្សរ៍ឆ្នាំ២០០០ ដោយឈានដល់កម្រិតកំពូលនៅឆ្នាំ២០១១ ជាមួយនឹងការវាយប្រហាររាប់រយករណី។ ចាប់តាំងពីពេលនោះមក ការដាក់ពង្រាយកងទ័ពជើងទឹកអន្តរជាតិ និងយុទ្ធសាស្ត្រថ្មីៗដោយប្រតិបត្តិករដឹកជញ្ជូនពាណិជ្ជកម្ម កាត់បន្ថយហានិភ័យបានយ៉ាងច្រើន។

គួរបញ្ជាក់ថា កងទ័ពជើងទឹកឥណ្ឌា ត្រូវបានដាក់ពង្រាយនៅឆ្នេរសមុទ្រសូម៉ាលី តាំងពីឆ្នាំ២០០៨ ហើយបានបង្កើន កិច្ចខិតខំប្រឹងប្រែងប្រឆាំងការលួចប្លន់តាមផ្លូវសមុទ្រ នៅឆ្នាំ២០២៣ បន្ទាប់ពីមានការកើនឡើងនៃការវាយប្រហារ រួមទាំងនៅសមុទ្រអារ៉ាប់ និងដោយក្រុមឧទ្ទាមហ៊ូទីយេម៉ែន ដែលគាំទ្រដោយអ៉ីរ៉ង់ នៅឯសមុទ្រក្រហម៕