(វ៉ាស៉ីនតោន)៖ រដ្ឋមន្ត្រីការបរទេសសហរដ្ឋអាមេរិក លោក Marco Rubio កាលពីថ្ងៃអង្គារ ទី២១ ខែកក្កដា ឆ្នាំ២០២៦ បានថ្កោលទោសការប្ដេជ្ញាចិត្ត របស់ប្រធានាធិបតីប្រទេសនីការ៉ាហ្កាលោក Daniel Ortega ដែលចង់រារាំងលែងឱ្យមានការបោះឆ្នោតតទៅទៀត ដើម្បីទប់ស្កាត់គណបក្សប្រឆាំងពីការឡើងដឹកនាំប្រទេស បន្ទាប់ពីរូបលោកបានកាន់អំណាចជិតពីរទសវត្សរ៍។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក Rubio បានលើកឡើងក្នុងសេចក្ដីថ្លែងការណ៍មួយ យ៉ាងដូច្នេះថា «ការប្រកាសរបស់លោក Daniel Ortega ដែលថា ក្រោមរបបផ្ដាច់ការរបស់គ្រួសារលោក នីការ៉ាហ្កានឹងមិនមានការបោះឆ្នោតទៀតទេ គឺបានបង្ហាញយ៉ាងច្បាស់ពីលក្ខណៈផ្ដាច់ការពិតប្រាកដរបស់ពួកគេ»។

លោក Rubio បានបន្ថែមថា «ប្រជាជននីការ៉ាហ្កា មានសិទ្ធិជ្រើសរើសមេដឹកនាំរបស់ពួកគេ តាមរយៈការបោះឆ្នោតបែបប្រជាធិបតេយ្យ» ហើយលោកអំពាវនាវឱ្យសហគមន៍អន្តរជាតិរួមគ្នា ដើម្បីបង្ហាញទៅ របបផ្ដាច់ការនីការ៉ាហ្កាថា ខ្លួនមិនអាចធ្វើអ្វីតាមតែអំពើចិត្តដោយមិនចាំបាច់ប្រឈមមុខជាមួយផលវិបាកនោះឡើយ។

លោក Ortega ដែលបច្ចុប្បន្នមានអាយុ ៨០ឆ្នាំ បានកាន់អំណាចតាំងពីឆ្នាំ២០០៧ បន្ទាប់ពីការបោះឆ្នោត ដែលត្រូវបានចោទសួរ ដោយសហគមន៍អន្តរជាតិ។ លោកត្រូវបានគេចោទប្រកាន់យ៉ាងទូលំទូលាយថា បានធ្វើចំណាត់ការធ្ងន់ៗ ដើម្បីបង្ក្រាបក្រុមប្រឆាំង និងរក្សាអំណាចនៅក្នុងប្រទេសអាមេរិកកណ្ដាលមួយនេះ។

កាលពីថ្ងៃអាទិត្យចុងសប្តាហ៍កន្លងទៅ ក្នុងព្រឹត្តិការណ៍មួយដើម្បីអបអរសាទរខួបលើកទី៤៧ នៃបដិវត្តន៍ Sandinista នៅក្នុងរដ្ឋធានី Managua លោក Ortega បាននិយាយថា៖ «ពួកគេគួរតែបំភ្លេចវាទៅ នៅទីនេះក្នុងប្រទេសនីការ៉ាហ្កា នឹងគ្មានការបោះឆ្នោតទៀតទេ ដើម្បីអាចឱ្យពួកគេព្យាយាមដណ្ដើមយករដ្ឋាភិបាល ហើយកាន់កាប់អំណាច»។

នីការ៉ាហ្កា តាមពិតទៅគឺត្រូវរៀបចំការបោះឆ្នោតសកល នៅខែវិច្ឆិកា ឆ្នាំ២០២៦នេះ ប៉ុន្តែប្រហែលជាមួយឆ្នាំកន្លះមុន ការធ្វើវិសោធនកម្មដ្ឋធម្មនុញ្ញ បានពង្រីកអាណត្តិប្រធានាធិបតីពី ៥ឆ្នាំ ទៅ៦ឆ្នាំ ដែលមានន័យថា ការបោះឆ្នោតឥឡូវ ត្រូវបានកំណត់ពេលសម្រាប់ឆ្នាំ២០២៧វិញ។

គួរបញ្ជាក់ថា លោក Ortega និងភរិយារបស់លោក គឺលោកស្រី Rosario Murillo បានគ្រប់គ្រងប្រទេសនីការ៉ាហ្កា អស់រយៈពេលជិតពីរទសវត្សរ៍ ដោយអំណាចផ្ដាច់ការ។ អ្នកទាំងពីរបានរក្សាការគ្រប់គ្រងយ៉ាងតឹងរ៉ឹង លើសង្គមនីការ៉ាហ្កា ចាប់តាំងពីការបង្ក្រាបយ៉ាងធ្ងន់ធ្ងរ លើការតវ៉ាក្នុងឆ្នាំ២០១៨ ដែលបើយោងតាមអង្គការសហប្រជាជាតិ គឺបណ្ដាលឱ្យមនុស្សជាង ៣០០នាក់ស្លាប់៕