(ម៉ានីល)៖ កាលពីថ្ងៃអង្គារ ទី២១ ខែកក្កដា ឆ្នាំ២០២៦ រដ្ឋមន្រ្តីការបរទេសថៃ បានប្រាប់ទីភ្នាក់ងារព័ត៌មាន AFP ថា មេដឹកនាំមីយ៉ាន់ម៉ា លោក Min Aung Hlaing នឹងជួបជាមួយនាយករដ្ឋមន្ត្រីថៃ លោក Auntin Charnvirakul នៅថ្ងៃទី៦ និងទី៧ ខែសីហា នៅឯទីក្រុងបាងកក។

ប្រមុខការទូតថៃ លោក Sihasak Phuangketkeow បានបញ្ជាក់ពីជំនួបខាងលើ បន្ទាប់ពីអ្វីដែលលោកហៅថា ជាការពិភាក្សាគ្នា «ដោយត្រង់ៗ» ជាមួយក្រុមរដ្ឋមន្ត្រីការបរទេសអាស៊ាននៅទីក្រុងម៉ានីល អំពីមធ្យោបាយល្អបំផុត ដើម្បីអាចឱ្យមីយ៉ាន់ម៉ាត្រឡប់មកចូលឆាកការទូតរបស់ប្លុកនេះវិញ។

ស្របពេលនៅតែជាសមាជិករបស់អាស៊ានក៏ដោយ មីយ៉ាន់ម៉ាត្រូវបានផាត់ចេញជាផ្លូវការ ពីកិច្ចប្រជុំសំខាន់ៗរបស់ប្លុកនេះ ចាប់តាំងពីរដ្ឋប្រហារឆ្នាំ២០២១ របស់របបយោធា បានផ្ដួលរំលំរដ្ឋាភិបាលជាប់ឆ្នោតតាមលទ្ធិប្រជាធិបតេយ្យរបស់លោកស្រី អោងសាន ស៊ូជី។

ប្រទេសថៃ ដែលមានព្រំដែនវែងជាប់នឹងប្រទេសមីយ៉ាន់ម៉ា ដែលរងការបែកបាក់ដោយសង្គ្រាមស៊ីវិល និងជាទីជម្រកសម្រាប់ជនភៀសខ្លួនរាប់លាននាក់ បាននិងកំពុងដឹកនាំការជំរុញឱ្យរដ្ឋដែលត្រូវបានគេបដិសេធមួយនេះ អាចធ្វើសមាហរណកម្មឡើងវិញ ខណៈបញ្ហានេះបានបង្ហាញពីការខ្វែងគំនិតគ្នាស៉ីជម្រៅ ក្នុងចំណោមសមាជិកអាស៊ាន។

គួរបញ្ជាក់ថា លោក Min Aung Hlaing កាលពីដើមខែនេះ បានបំពេញទស្សនកិច្ចទៅកាន់ប្រទេសឡាវ ខណៈវាគឺជា​ទស្សនកិច្ចដំបូងបំផុតទៅកាន់រដ្ឋដែលជាសមាជិកអាស៊ាន ចាប់តាំងពីលោកបានក្លាយជាប្រធានាធិបតីស៉ីវិលរបស់មីយ៉ាន់ម៉ា កាលពីខែមេសា ឆ្នាំនេះ ក្រោយកាន់អំណាចជាប្រមុខរដ្ឋាភិបាលយោធា អស់រយៈពេលជាង៥ឆ្នាំ៕