(កៀវ)៖ អគ្គមេបញ្ជាការយោធារបស់អ៊ុយក្រែន ដែលត្រូវបានបណ្តេញចេញពីតំណែង គឺលោកឧត្តមសេនីយ៍ Oleksandr Syrskyi នាថ្ងៃពុធ ទី២២ ខែកក្កដា ឆ្នាំ២០២៦ បានអះអាងថា ក្នុងឆ្នាំនេះ អ៊ុយក្រែនវាយដណ្តើមយកទឹកដីមកវិញបានទំហំ ​៧០០គីឡូម៉ែត្រក្រឡា ហើយលោកក៏បានបញ្ជាក់ផងដែរថា រូបលោកនឹងត្រូវចាកចេញពីមុខតំណែងជាមេទ័ពកំពូលនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Syrskyi បានថ្លែងក្នុងសេចក្តីថ្លែងការណ៍មួយនៅលើបណ្តាញ Telegram ថា «ខ្ញុំកំពុងប្រគល់កងទ័ពមួយ ទៅកាន់អ្នកស្នងតំណែងរបស់ខ្ញុំ ដែលមិនត្រឹមតែកំពុងការពារប៉ុណ្ណោះទេ ប៉ុន្តែក៏កំពុងវាយលុកផងដែរ»។ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានប្រកាសកាលពីថ្ងៃអង្គារថា ឧត្តមសេនីយ៍ Mykhailo Drapatyi នឹងឡើងជំនួសលោក Syrskyi បន្ទាប់ពីផ្ទុះការតវ៉ាតាមដងផ្លូវជាច្រើនថ្ងៃមកនេះ។

ការផ្លាស់ប្តូរខាងលើ បានកើតឡើងបន្ទាប់ពីការដកតំណែងរដ្ឋមន្ត្រីការពារជាតិ លោក Mykhailo Fedorov នៅក្នុងការរុះរើគណៈរដ្ឋមន្ត្រីទ្រង់ទ្រាយធំ កាលពីសប្តាហ៍មុន ដែលបានលាតត្រដាងនូវភាពបែកបាក់ស៉ីជម្រៅ នៅក្នុងជួរថ្នាក់ដឹកនាំវិស័យការពារជាតិរបស់អ៊ុយក្រែន។ លោក Fedorov ត្រូវគេដឹងថាមានទំនាស់ជាមួយលោក Syrsky ជុំវិញការធ្វើកំណែទម្រង់យោធា ប៉ុន្តែបន្ទាប់ពីលោក ហ្សេលេនស្គី បានសម្រេចដកតំណែងលោក Fedovrov ជារដ្ឋមន្រ្តីការពារជាតិ ប្រជាជនអ៊ុយក្រែនក៏បាននាំគ្នាចេញធ្វើបាតុកម្មតាមដងផ្លូវ។

លោក Syrskyi បានកាន់តំណែងជាអគ្គមេបញ្ជាការយោធា តាំងពីដើមឆ្នាំ២០២៤ បន្ទាប់ពីបានដើរតួនាទីយ៉ាងសំខាន់ ក្នុងការការពារទីក្រុង Kyiv អំឡុងដំណាក់កាលដំបូង នៃសង្រ្គាមជាមួយរុស្ស៉ី និងក្នុងប្រតិបត្តិការវាយបកយ៉ាងលឿន ដើម្បីដណ្ដើមយកតំបន់ Kharkiv ភាគឦសាន មកវិញកាលពីក្នុងឆ្នាំ២០២២។ ប៉ុន្តែលោកបានប្រឈមមុខនឹង ការរិះគន់យ៉ាងខ្លាំងជុំវិញរបៀបរបបដឹកនាំមានលក្ខណៈតឹងរ៉ឹងខ្លាំង ដែលសមាជិកយោធាខ្លះ និយាយថា វាបានបណ្តាលឱ្យមានការបាត់បង់កងទ័ពក្នុងចំនួនខ្ពស់ហួសហេតុ។

នៅក្នុងសេចក្តីថ្លែងការណ៍របស់លោក លោក Syrskyi បានគូសរំលេចពីស្នាដៃនានារបស់លោក ក្នុងនោះរួមទាំងការរារាំងការវាយលុករបស់រុស្ស៊ី នៅក្នុងតំបន់ Kharkiv និងប្រតិបត្តិការចូលលុកលុយតំបន់ Kursk របស់រុស្ស៊ី កាលពីក្នុងឆ្នាំ ២០២៤៕