(ម៉ានីល)៖ រដ្ឋមន្ត្រីការបរទេសសហរដ្ឋអាមេរិក លោក ម៉ាកូ រូប៊ីយ៉ូ (Marco Rubio) បានថ្លែងថា នៅថ្ងៃពុធនេះ លោកបានជួបពិភាក្សាការងារជាមួយរដ្ឋមន្ត្រីការបរទេសចិន លោក វ៉ាង យី (Wang Yi) ជុំវិញភាពចាំបាច់ក្នុងការកំណត់រកចំណុចនៃកិច្ចសហប្រតិបត្តិការរវាងគ្នា ដើម្បីត្រួសត្រាយផ្លូវឱ្យដំណើរទស្សនកិច្ចរបស់ប្រធានាធិបតីចិន លោក ស៊ី ជិនពីង ទៅកាន់ទីក្រុងវ៉ាស៊ីនតោន នាខែកញ្ញាខាងមុខ ប្រព្រឹត្តទៅប្រកបដោយ «ភាពវិជ្ជមានបំផុត»។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នៅក្នុងជំនួបក្រៅផ្លូវការនៃកិច្ចប្រជុំតំបន់ដែលដឹកនាំដោយអាស៊ាន នាទីក្រុងម៉ានីល ប្រទេសហ្វីលីពីន លោក រូប៊ីយ៉ូ បានទទួលស្គាល់ថា ភាគីទាំងពីរនៅតែមានភាពខ្វែងគំនិតគ្នាច្រើន ប៉ុន្តែភារកិច្ចចម្បងរបស់ពួកគេគឺត្រូវគ្រប់គ្រងភាពខុសគ្នាទាំងនោះ កុំឱ្យវិវឌ្ឍទៅរកការបាត់បង់ការគ្រប់គ្រង។

លោកបានប្រាប់ក្រុមអ្នកសារព័ត៌មានថា «កិច្ចការដែលយើងត្រូវធ្វើសម្រាប់ខែកញ្ញា គឺស្វែងរកឱ្យឃើញថា តើមានវិស័យណាខ្លះដែលយើងអាចសហការគ្នាបាន ដើម្បីរៀបចំឱ្យដំណើរទស្សនកិច្ចនេះទទួលបានលទ្ធផលវិជ្ជមានបំផុត។ យើងបានជជែកគ្នាច្រើនអំពីបញ្ហានេះ»។ លោកបានបន្ថែមថា ការខ្វែងគំនិតគ្នានឹងនៅតែបន្តមាន ហើយភាគីនីមួយៗប្រាកដជានឹងការពារផលប្រយោជន៍ជាតិរៀងៗខ្លួន ប៉ុន្តែលោកជឿជាក់ថានៅមានវិស័យមួយចំនួនដែលអាចសហការគ្នាបាន។

ទោះជាយ៉ាងណា ក្រោយបញ្ចប់ជំនួបនេះ លោក វ៉ាង យី មិនបានធ្វើអត្ថាធិប្បាយទៅកាន់អ្នកសារព័ត៌មានឡើយ ហើយរដ្ឋាភិបាលចិនក៏មិនទាន់បានចេញសេចក្តីថ្លែងការណ៍ផ្លូវការណាមួយ ជុំវិញកិច្ចពិភាក្សាជាមួយលោក រូប៊ីយ៉ូ នេះនៅឡើយទេ៕