(ប៉េកាំង)៖ កាលពីថ្ងៃពុធសប្តាហ៍នេះ ចិនបានព្រមានពីលទ្ធភាពសងសឹក ទៅនឹងច្បាប់ថ្មីរបស់បារាំង ដែលមានគោលដៅទប់ស្កាត់ការកើនឡើង នូវលំហូរសម្លៀកបំពាក់តម្លៃធូរថ្លៃ ដោយនិយាយថា ច្បាប់នេះមានលក្ខណៈរើសអើង និងបំពានគោលការណ៍ពាណិជ្ជកម្ម។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នាថ្ងៃព្រហស្បតិ៍ ទី២៣ ខែកក្កដា ឆ្នាំ២០២៦។

ច្បាប់ដែលសភាបារាំងទើបអនុម័តកាលពីចុងខែមុន ហើយកំណត់យកថ្លៃសេវានាំចូលក្នុងទំនិញមួយមុខ ចាប់ពីថ្ងៃទី១ ខែកញ្ញាតទៅ នឹងប៉ះពាល់ដល់ App លក់ទំនិញលក់រាយធំៗរបស់ចិន ដូចជា Shein, Temu និង AliExpress។ ក្រុមហ៊ុនសម្លៀកបំពាក់មិនសូវមានគុណភាព ផលិតក្នុងចំនួនច្រើនសម្បើម និងមានតម្លៃធូរថ្លៃខ្លាំង ត្រូវបានគេស្គាល់ថាបានរួមចំណែកដល់ការបំពុលបរិយាកាស តាមរយៈឧស្សាហកម្មវាយនភណ្ឌ ដែលជាប្រភពបញ្ចេញឧស្ម័នផ្ទះកញ្ចក់ដ៏ធំ។

អ្នកនាំពាក្យក្រសួងពាណិជ្ជកម្មចិនម្នាក់ បាននិយាយក្នុងលក្ខខណ្ឌមិនបញ្ចេញឈ្មោះថា ច្បាប់ក្រោមលេសកំណត់ស្តង់ដារការពារបរិស្ថាន និងនិរន្តរភាព តាមពិតគឺកំពុងអនុវត្តវិធានការរើសអើង និងសង្ស័យរំលោភលើគោលការណ៍របស់អង្គការពាណិជ្ជកម្មពិភពលោក (WTO) ក៏ដូចជាបង្កើតរបាំងពាណិជ្ជកម្មប្រឆាំងប្រទេសចិន។ «យើងជំរុញឱ្យបារាំងអនុវត្តតាមច្បាប់ WTO និងកែតម្រូវជាបន្ទាន់នូវការរើសអើង»។ នេះជាការគូសបញ្ជាក់របស់អ្នកនាំពាក្យដដែល ដោយព្រមានពីវិធានការចាំបាច់ដើម្បីសងសឹក ប្រសិនបើសិទ្ធិ និងផលប្រយោជន៍ស្របច្បាប់របស់ក្រុមហ៊ុនចិនរងការបំពាន។

គួរបញ្ជាក់ថា ច្បាប់ថ្មីរបស់បារាំង ក៏នឹងហាមឃាត់ការផ្សាយពាណិជ្ជកម្មឱ្យម៉ាកសម្លៀកបំពាក់តម្លៃធូរថ្លៃ រួមទាំងសម្រាប់អ្នកមានឥទ្ធិពលលើបណ្ដាញសង្គមផងដែរ។ ប្រជាជនបារាំងមួយចំនួនបានរិះគន់ច្បាប់នេះ ចំពោះការលើកលែងក្រុមហ៊ុនអឺរ៉ុប និងបារាំង រួមមាន Zara និង Kiabi៕