(ប៉េកាំង)៖ ចិនបានប្រកាសចាប់ផ្តើមការធ្វើសមយុទ្ធបាញ់គ្រាប់ពិតរយៈពេលពីរថ្ងៃ ចាប់ពីថ្ងៃព្រហស្បតិ៍នេះ នៅផ្នែកមួយចំនួន នៃច្រកសមុទ្រតៃវ៉ាន់ ក្បែរឆ្នេរខេត្ត Fujian ភាគអាគ្នេយ៍ប្រទេសរបស់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃព្រហស្បតិ៍ ទី២៣ ខែកក្កដា ឆ្នាំ២០២៦។

ការប្រកាសធ្វើសមយុទ្ធនេះ គឺកើតឡើងមួយថ្ងៃបន្ទាប់ពីកិច្ចពិភាក្សារវាងរដ្ឋមន្ត្រីការបរទេសអាមេរិក លោក Marco Rubio និងរដ្ឋមន្ត្រីការបរទេសចិន លោក Wang Yi លើបញ្ហាជាច្រើន រួមមានទាំងតៃវ៉ាន់ ដែលស្ថិតក្រោមការដឹកនាំតាមលទ្ធិប្រជាធិបតេយ្យ ប៉ុន្តែត្រូវចិនអះអាងជាទឹកដីរបស់ខ្លួន។ តាមសេចក្តីជូនដំណឹងរបស់អាជ្ញាធរដែនសមុទ្រចិន សមយុទ្ធខាងលើ នឹងប្រព្រឹត្តទៅចាប់ពីម៉ោង ៦:០០ព្រឹក ដល់៦:០០ល្ងាច ក្នុងមួយថ្ងៃៗ នៅជុំវិញកោះ Dongshan ដែលជាប់ព្រំប្រទល់ខេត្ត Guangdong។

គួរបញ្ជាក់ថា ចិនបានធ្វើសមយុទ្ធយោធាទ្រង់ទ្រាយធំបំផុតរបស់ខ្លួន នៅជុំវិញកោះតៃវ៉ាន់ កាលពីខែធ្នូ ឆ្នាំ២០២៥ បន្ទាប់ពីសហរដ្ឋអាមេរិក បានប្រកាសកញ្ចប់សព្វាវុធធំបំបែកកំណត់ត្រា​ ជាមួយទំហឹទឹកប្រាក់ ១១,១ពាន់លានដុល្លារ សម្រាប់តៃវ៉ាន់។ ក្នុងអំឡុងការហាត់សមបាញ់គ្រាប់ពិតប្រមាណជា១០ម៉ោង កាលពីពេលនោះ បញ្ជាការដ្ឋានយោធាភាគខាងកើតរបស់ចិន បានបាញ់រ៉ុក្កែតចូលទៅក្នុងដែនទឹកនៅភាគខាងជើង និងខាងត្បូងកោះតៃវ៉ាន់៕