(មូស្គូ)៖ ក្រសួងការបរទេសរុស្ស៉ី បានអះអាងថា ទីក្រុងមូស្គូនាថ្ងៃព្រហស្បតិ៍ ទី២៣ ខែកក្កដា ឆ្នាំ២០២៦ បានព្រមានសហរដ្ឋអាមេរិក ប្រឆាំងការផ្តល់អាវុធដល់អ៊ុយក្រែន ដែលជារឿងមិនអាចទទួលយកបាន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

សេចក្តីថ្លែងការណ៍របស់ក្រសួងការបរទេសរុស្ស៉ី បាននិយាយថា ប្រមុខការទូតរុស្ស៉ី លោក Sergei Lavrov បានសង្កត់ធ្ងន់ថា វាគឺជារឿងមិនអាចទទួលយកបាននោះឡើយ ក្នុងការបន្តផ្គត់ផ្គង់សព្វាវុធដល់ទីក្រុងកៀវ នាឱកាសដែលរូបលោកបានជួបជាមួយ​សមភាគីអាមេរិក លោក Marco Rubio អំឡុងព្រឹត្តិការណ៍កិច្ចប្រជុំរដ្ឋមន្រ្តីការបរទេសអាស៊ាន ដែលប្រារព្ធឡើងនៅទីក្រុងម៉ានីលនៃ​ប្រទេសហ្វីលីពីន។ ចំណែក ក្រសួងការបរទេសអាមេរិក បាននិយាយថា ប្រមុខការទូតទាំងពីរ បានជជែកគ្នាអំពីទំនាក់ទំនងអាមេរិក-រុស្ស៉ី ហើយនិង​ភាពចាំបាច់ដើម្បីបិទបញ្ចប់សង្រ្គាមនៅអ៊ុយក្រែន។

គួរបញ្ជាក់ថា កិច្ចប្រឹងប្រែងចរចាសំដៅស្វែងរកទីបញ្ចប់សម្រាប់ជម្លោះអ៊ុយក្រែន បាននិងកំពុងជាប់គាំង ចាប់តាំងពីអាមេរិកបានងាកទៅផ្តោតសំខាន់លើ សង្រ្គាមរបស់ខ្លួនផ្ទាល់ជាមួយអ៉ីរ៉ង់ នៅមជ្ឈិមបូព៌ា ហើយទីក្រុងមូស្គូនៅតែរក្សាលក្ខខណ្ឌទាមទារ​ឱ្យទីក្រុងកៀវបោះបង់ទឹកដីរបស់ខ្លួន។ នាថ្ងៃព្រហស្បតិ៍នេះ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានបង្ហោះសារថា រូបលោកបានសន្ទនាអំពីមធ្យោបាយ ដើម្បីស្តារកិច្ចប្រឹងប្រែងការទូតឡើងវិញ ជាមួយបេសកជនពិសេសអាមេរិក លោក Steve Witkoff និង លោក Jared Kushner៕