(ម៉ានីល)៖ យោងតាមសេចក្តីព្រាងនៃសេចក្តីថ្លែងការណ៍ដែល AFP ទទួលបាននាថ្ងៃព្រហស្បតិ៍ ទី២៣ ខែកក្កដា ឆ្នាំ២០២៦ បណ្តារដ្ឋមន្រ្តីការបរទេសនៃសមាគមប្រជាជាតិអាស៉ីអាគ្នេយ៍ (ASEAN) នឹងអំពាវនាវរកសេរីភាពនៃការធ្វើនាវាចរឡើងវិញ នៅតាមច្រកសមុទ្រអន្តរជាតិ នៅពេលបញ្ចប់កិច្ចប្រជុំរយៈពេល ១សប្តាហ៍ ដែលភាគច្រើនគ្របដណ្តប់លើ បញ្ហាពាក់ព័ន្ធសង្គ្រាមសហរដ្ឋអាមេរិក និងអ៉ីរ៉ង់។

សេចក្តីព្រាងនៃសេចក្តីថ្លែងការណ៍ បានបញ្ចូលពាក្យពេចន៍ដែលមិនធ្លាប់ប្រើពីមុនមក សម្តៅលើសេរីភាពនៃការធ្វើនាវាចរក្នុងសមុទ្រ និងការហោះហើរពីលើច្រកសមុទ្រ ខណៈបង្ហាញការទាមទារដាច់ដោយឡែកមួយ ឱ្យមានការឆ្លងកាត់ដោយគ្មានឧបសគ្គ តាមច្រកសមុទ្រ Hormuz។

អាស៊ាន ក៏នឹងអំពាវនាវជាថ្មីឱ្យមានការអត់ធ្មត់ ក្នុងជម្លោះនៅមជ្ឈិមបូព៌ា ដែលបានបង្កផលប៉ះពាល់ ដល់ផ្នែកសេដ្ឋកិច្ចពាសពេញតំបន់។ ការបិទច្រកសមុទ្រ បន្ទាប់ពីផ្ទុះសង្រ្គាមនៅមជ្ឈិមបូព៌ា តម្រូវឱ្យមានការប្រញាប់ប្រញាល់ដោះស្រាយបញ្ហាខ្វះខាតថាមពល និងបានធ្វើឱ្យតម្លៃប្រេងឡើងថ្លៃ ហើយហ្វីលីពីនដែលជាប្រធានអាស៊ានប្តូរវេនឆ្នាំនេះ ហើយជាប្រទេសពឹងផ្អែកលើការនាំចូលប្រេង បានប្រកាសអាសន្នថ្នាក់ជាតិ៕