(ប្រាស៉ីលីយ៉ា)៖ រដ្ឋាភិបាលប្រេស៉ីល បានប្រកាសផ្តល់ថវិកា ៣,៦៦ពាន់លានដុល្លារ សម្រាប់ជួយដល់ក្រុមហ៊ុនដែលរងផលប៉ះពាល់ ដោយសារតែពន្ធគយរបស់សហរដ្ឋអាមេរិក ដែលមានសុពលចាប់ពីថ្ងៃពុធសប្តាហ៍នេះ ដោយបន្ថែមថាវាក៏នឹងជួយដល់សហគ្រាសដែលរងគ្រោះ ពីជម្លោះបរទេសផងដែរ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី២៣ ខែកក្កដា ឆ្នាំ២០២៦។

នៅក្នុងសេចក្តីថ្លែងការណ៍ រដ្ឋបាលប្រធានាធិបតី Lula បានឱ្យដឹងថា ឥណទានជាង ២,៦៦ពាន់លានដុល្លារ នឹងយកមកពីក្រសួងហិរញ្ញវត្ថុ រីឯធនាគារអភិវឌ្ឍរបស់រដ្ឋ BNDES នឹងផ្តល់ជិត ១ពាន់លានដុល្លារទៀត។ ឧស្សាហកម្មដែលរងផលប៉ះពាល់ដោយពន្ធគយ ២៥ភាគរយរបស់សហរដ្ឋអាមេរិក នឹងត្រូវបានផ្តល់អាទិភាព តួយ៉ាង ឧស្សាហកម្មដែក អាលុយមីញ៉ូម និងស្បែកជើង។

ឥណទានដែលកំពុងរង់ចាំការអនុម័តពីសភានេះ នឹងជួយដល់ក្រុមហ៊ុននានា ដែលស្វែងរកដើមទុនដើម្បីបង្វិល គ្រឿងចក្រ បរិក្ខារ វិនិយោគ ឬរកទីផ្សារថ្មីៗ។ វាគឺជាដំណាក់កាលទី ៣ នៃកម្មវិធីដែលរដ្ឋាភិបាលប្រេស៉ីលបង្កើតឡើងឆ្នាំមុន ដើម្បីឆ្លើយតបនឹងជុំដំបូងនៃពន្ធគយអាមេរិក។ កម្មវិធីនេះផ្តល់ឥណទានឧបត្ថម្ភធន និងលើកទឹកចិត្តឧស្សាហកម្មដែលរងផលប៉ះពាល់ ឱ្យមានលទ្ធភាពស្វែងរកទីផ្សារថ្មី៕