(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានប្រកាសព្រមានយ៉ាងច្បាស់ថា សហរដ្ឋអាមេរិកនឹងទម្លាក់ការទទួលខុសត្រូវទាំងស្រុងទៅលើប្រទេសអ៊ីរ៉ង់ចំពោះការវាយប្រហាររបស់ក្រុមឧទ្ទាមហ៊ូទី ទៅលើនាវាដឹកប្រេងរបស់អារ៉ាប៊ីសាអូឌីតនៅសមុទ្រក្រហម ដោយលោកហៅក្រុមហ៊ូទីថាជា «កូនអុក ឬភ្នាក់ងារតំណាងរបស់អ៊ីរ៉ង់»។

តាមរយៈការបង្ហោះសារនៅលើបណ្តាញសង្គម Truth Social លោក ត្រាំ បានសរសេរថា «កាលពីមួយឆ្នាំមុន សហរដ្ឋអាមេរិកបានវាយប្រហារយ៉ាងចាស់ដៃទៅលើក្រុមហ៊ូទី ដោយសារតែពួកគេបានរំខានដល់ពាណិជ្ជកម្ម តាមរយៈការបាញ់ប្រហារលើនាវានានា។ ចាប់តាំងពីពេលនោះមក និងក្នុងអំឡុងពេលជម្លោះរបស់យើងជាមួយអ៊ីរ៉ង់ ពួកគេបានធ្វើសកម្មភាពប្រកបដោយការទទួលខុសត្រូវខ្ពស់»។

លោកបានបន្ថែមថា «ប៉ុន្តែជារឿងគួរឱ្យសោកស្តាយ ដែលពេលនេះពួកគេចាប់ផ្តើមធ្វើវាឡើងវិញ ដោយបានបាញ់ប្រហារលើនាវាអារ៉ាប៊ីសាអូឌីតចំនួន ២គ្រឿងកាលពីយប់មិញ។ តាមរយៈសារនេះ ខ្ញុំសូមបញ្ជាក់ឱ្យច្បាស់ថា ប្រសិនបើពួកគេហ៊ានធ្វើបែបនេះម្តងទៀត សហរដ្ឋអាមេរិកនឹងទម្លាក់ការទទួលខុសត្រូវទៅលើអ៊ីរ៉ង់ ដោយសារហ៊ូទីគឺជាកូនអុករបស់អ៊ីរ៉ង់ ហើយការផ្តន្ទាទោសផ្នែកយោធាដ៏ធ្ងន់ធ្ងរនឹងត្រូវធ្លាក់ទៅលើអ៊ីរ៉ង់ ក៏ដូចជាក្រុមហ៊ូទីខ្លួនឯងផ្ទាល់ផងដែរ ដែលនេះធ្វើឱ្យខ្ញុំខកចិត្តយ៉ាងខ្លាំង ព្រោះកន្លងមកពួកគេធ្វើសកម្មភាពប្រកបដោយវិជ្ជាជីវៈ និងឆ្លាតវៃ»៕