(កៀវ)៖ នាថ្ងៃសុក្រ ទី២៤ ខែកក្កដា ឆ្នាំ២០២៦ មនុស្ស៣នាក់បានរងរបួស ក្រោយការវាយប្រហារដោយដ្រូនរបស់អ៊ុយក្រែន បានបង្កជាគ្រោះអគ្គិភ័យនៅឃ្លាំងស្តុកតវ៉ាន់មួយកន្លែង ដែលជាកម្មសិទ្ធិក្រុមហ៊ុនលក់ទំនិញអនឡាញយក្សរបស់រុស្ស៉ី Wildberries នៅក្បែរទីក្រុង Saint Petersburg។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ទីក្រុងកៀវបានកំណត់គោលដៅលើទីក្រុង Saint Petersburg ដែលជាទីក្រុងធំជាងគេបង្អស់លំដាប់ទី២របស់រុស្ស៉ី ស្របពេល​ដែលខ្លួនបង្កើនការវាយប្រហារចម្ងាយឆ្ងាយ ទៅលើទីតាំងថាមពល យោធា និងឡូជីស្ទីគរបស់រុស្ស៉ី អំឡុងពេលប៉ុន្មានខែមកនេះ។ ក្រោយការវាយប្រហាររបស់អ៊ុយក្រែន គេឃើញមានផ្សែងធំសម្បើម ហុយទ្រលោមឡើងទៅលើផ្ទៃអាកាស នៅទីក្រុង Saint Petersburg ដែលមានចម្ងាយជាង៨០០គីឡូម៉ែត្រ ពីព្រំប្រទល់អ៊ុយក្រែន ហើយអាជ្ញាធរប្រចាំតំបន់ បានរាយការណ៍ថា ឃ្លាំងស្តុកទំនិញរបស់ក្រុមហ៊ុន Wildberries បានរងការឆាបឆេះ ខណៈមនុស្ស៣នាក់បានរងរបួស។

គិតចាប់តាំងពីថ្ងៃទី១៨ ខែកក្កដា អ៊ុយក្រែនបានវាយប្រហារឃ្លាំងស្តុកទំនិញរបស់ Wildberries សរុប៥កន្លែង ខណៈមជ្ឈមណ្ឌលឡូជីស្ទីគមួយកន្លែងរបស់ក្រុមហ៊ុននេះ ដែលស្ថិតនៅជាយរដ្ឋធានីមូស្គូ បានរងការវាយប្រហារ កាលពីសប្តាហ៍មុន បណ្តាលឱ្យបុគ្គលិកកាន់ការវេនយប់៨នាក់ស្លាប់ ហើយអគារនោះ ត្រូវបានភ្លើងឆេះគ្មានសល់។ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានអះអាងថា ទីតាំងទាំងនោះ គឺត្រូវបានប្រើប្រាស់ក្នុងការ​ផ្គត់ផ្គង់គ្រឿងបង្គំដែលជាប់ទណ្ឌកម្ម សម្រាប់ការផលិតដ្រូននិងឧបករណ៍នាំផ្លូវ។

ទីក្រុងមូស្គូ នៅថ្ងៃសុក្រនេះ បានរាយការណ៍ថា យន្តហោះដ្រូនអ៊ុយក្រែនសរុប៥៧១គ្រឿង ត្រូវបានបាញ់ទម្លាក់។ ទីក្រុងកៀវប្រកាន់ជំហរថា សកម្មភាពវាយប្រហាររបស់ខ្លួន គឺជាទង្វើស្មើភាពគ្នាសម្រាប់ការដែលទីក្រុងមូស្គូ បានបើកការវាយប្រហារ​តាមផ្លូវអាកាសសឹងតែរៀងរាល់ថ្ងៃមកលើទឹកដីរបស់អ៊ុយក្រែន អំឡុងសង្រ្គាមជាង៤ឆ្នាំកន្លះមកនេះ។ រយៈពេលប៉ុន្មានខែចុងក្រោយ ទាំងរុស្ស៉ីនិងអ៊ុយក្រែន សុទ្ធតែបានបង្កើនការវាយប្រហារចម្ងាយឆ្ងាយដូចគ្នា។

គួរបញ្ជាក់ថា អង្គការសហប្រជាជាតិ បានរាយការណ៍ពីការកើនឡើងគួរឱ្យកត់សម្គាល់ នៃចំនួនជនស៉ីវិលបាត់បង់ជីវិត ក្នុងឆ្នាំ២០២៦នេះ ដោយនិយាយថា ខែមិថុនាគឺជាខែដែលមានអ្នកស្លាប់ច្រើនបំផុត គិតចាប់តាំងពីពាក់កណ្តាលឆ្នាំ២០២២។ ទាហានរាប់សែននាក់ និងជនស៊ីវិលរាប់ម៉ឺននាក់ ត្រូវគេជឿថាបានស្លាប់ ចាប់តាំងពីរុស្ស៊ីបំផ្ទុះសង្រ្គាមប្រឆាំងអ៊ុយក្រែន កាលពីខែកុម្ភៈ ឆ្នាំ២០២២ ប៉ុន្តែមិនមានតួលេខច្បាស់លាស់ឡើយ ដោយសារភាគីទាំងពីរ មិនបានបង្ហាញជាប្រចាំ ពីចំនួនសរុបនៃមនុស្សដែលបានបាត់បង់ជីវិត នោះទេ៕