(ប៉េកាំង)៖ ទីក្រុងប៉េកាំង បានថ្កោលទោសចំពោះពន្ធគយថ្មីរបស់សហរដ្ឋអាមេរិក ដែលបានដាក់មកលើប្រទេសចិន និង ៥៩ ប្រទេសផ្សេងទៀត ជុំវិញការចោទប្រកាន់ពី ការព្រួយបារម្ភអំពីបញ្ហានៃការប្រើប្រាស់កម្លាំងពលកម្មដោយបង្ខំ នាថ្ងៃសុក្រ ទី២៤ ខែកក្កដា ឆ្នាំ២០២៦ ហើយបានព្រមានទីក្រុងវ៉ាស៊ីនតោន ប្រឆាំងការបង្កសង្គ្រាមពាណិជ្ជកម្ម។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ចំណាត់ការពន្ធគយថ្មីរបស់អាមេរិក គឺមានអត្រាចាប់ពី១០ភាគរយ ដល់ ១២,៥ភាគរយ ដោយប្រទេសចិន ត្រូវបានដាក់អត្រាដែលខ្ពស់បំផុត។ ពន្ធថ្មីនេះគឺជំនួសពន្ធគយសកល១០ភាគរយចាស់ ដែលផុតកំណត់ ត្រូវបានដាក់ចេញដោយប្រធានាធិបតី ដូណាល់ ត្រាំ កាលពីខែកុម្ភៈ ឆ្នាំនេះ។

លោក Lin Jian អ្នកនាំពាក្យក្រសួងការបរទេសចិន បាននិយាយក្នុងសន្និសីទសារព័ត៌មានមួយ នាថ្ងៃសុក្រនេះថា «យើងប្រឆាំងគ្រប់ទម្រង់នៃវិធានការពន្ធឯកតោភាគី» ហើយលោកបានព្រមានថា «សង្គ្រាមពន្ធនិងសង្គ្រាមពាណិជ្ជកម្ម មិនមែនជាផលប្រយោជន៍របស់ភាគីណាមួយឡើយ»។

រដ្ឋបាលលោក ត្រាំ បានបោះជំហានយ៉ាងលឿន ដើម្បីកសាងជញ្ជាំងពន្ធរបស់លោកប្រធានាធិបតីឡើងវិញ បន្ទាប់ពីតុលាការកំពូលអាមេរិក បានលុបចោលចំណាត់ការពន្ធគយភាគច្រើនរបស់លោក កាលពីខែកុម្ភៈ ដែលបានធ្វើឲ្យប៉ះពាល់ដល់សមត្ថភាពរបស់លោក ក្នុងការដំឡើងពន្ធខ្ពស់តាមអំពើចិត្ត។

ក្នុងសេចក្តីប្រកាសអំពីពន្ធគយថ្មីខាងលើ លោក Jamieson Greer ប្រធានតំណាងពាណិជ្ជកម្មអាមេរិក បាននិយាយថា ទីក្រុងវ៉ាស៊ីនតោនបានអនុវត្តយ៉ាងម៉ឺងម៉ាត់ នូវការហាមឃាត់ការនាំចូលដែលពាក់ព័ន្ធការប្រើប្រាស់កម្លាំងពលកម្មដោយបង្ខំ ខណៈលោកសង្កត់ធ្ងន់ថា វាហួសពេលហើយសម្រាប់ឱ្យដៃគូពាណិជ្ជកម្មរបស់អាមេរិក ក្នុងការធ្វើដូចគ្នា។

បណ្តាប្រទេសដែលមានអនុវត្តវិធានការទប់ស្កាត់ការប្រើកម្លាំងពលកម្មដោយបង្ខំ រួមមានដូចជា កាណាដា សហភាពអឺរ៉ុប និងចក្រភពអង់គ្លេស បានរងអត្រាត្រឹម ១០ភាគរយ ខណៈដៃគូពាណិជ្ជកម្មសំខាន់ៗដទៃទៀត រួមមាន ឥណ្ឌា និងជប៉ុន ត្រូវបានដាក់ពន្ធខ្ពស់ ១២,៥ ភាគរយ។

គួរបញ្ជាក់ថា ចិ និងអាមេរិក ដែលបានចំណាយពេលភាគច្រើនកាលពីឆ្នាំមុន ជាប់ជំពាក់ក្នុងសង្គ្រាមពាណិជ្ជកម្ម ដែលឡើងកម្តៅជាខ្លាំងនោះ បានឈានដល់កិច្ចព្រមព្រៀងជាមួយគ្នា នៅពេលដែលលោក ត្រាំ និងប្រធានាធិបតី ស៊ី ជីនពីង បានជួបគ្នាកាលពីខែតុលា ឆ្នាំ២០២៥។ បន្ទាប់ពីលោក ត្រាំ បានបំពេញទស្សនកិច្ចនៅទីក្រុងប៉េកាំង កាលពីខែឧសភា ឆ្នាំនេះ ចិនបាននិយាយថា ខ្លួននឹងធ្វើការជាមួយអាមេរិកក្នុងការកាត់បន្ថយពន្ធ ប៉ុន្តែពន្ធគយថ្មីចុងក្រោយបំផុតខាងលើនេះ កំពុងគំរាមកំហែងដុតបញ្ឆេះភាពតានតឹងផ្នែកពាណិជ្ជកម្មឡើងវិញ រវាងកំពូលមហាអំណាចសេដ្ឋកិច្ចទាំងពីរ៕