(វ៉ាស៊ីនតោន)៖ សហរដ្ឋអាមេរិក នៅថ្ងៃសុក្រនេះ បានប្រកាសដាក់ទណ្ឌកម្មថ្មីលើក្រុមហ៊ុនចំនួន ៩ និងបុគ្គល ៤រូប ដែលមានទំនាក់ទំនងជាមួយមហាសេដ្ឋីហិរញ្ញវត្ថុអ៊ីរ៉ង់ លោក បាបាក់ ហ្សានចានី (Babak Zanjani) ជុំវិញការព្យាយាមគេចវេះពីទណ្ឌកម្មរបស់អាមេរិក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្រសួងរតនាគារអាមេរិកបានបញ្ជាក់ថា ទណ្ឌកម្មនេះកំណត់គោលដៅលើក្រុមហ៊ុនសម្ព័ន្ធ "Dot One" របស់លោក ហ្សានចានី នៅអ៊ីរ៉ង់ និងក្រុមហ៊ុនជាច្រើនទៀតនៅតួកគី និងអេមីរ៉ាតអារ៉ាប់រួម ដែលបានជួយគាំទ្រដល់ការជួញដូររូបិយប័ណ្ណឌីជីថលរបស់លោក។ ក្រសួងបានចោទប្រកាន់លោក ហ្សានចានី ថាបានប្រើប្រាស់មុខជំនួញជាច្រើន ដូចជាសេវាកម្មហិរញ្ញវត្ថុ រូបិយប័ណ្ណឌីជីថល ត្បូងមាស និងហេដ្ឋារចនាសម្ព័ន្ធ ដើម្បីលាងលុយកខ្វក់ និងផ្ទេរប្រាក់ដោយសម្ងាត់ឱ្យរដ្ឋាភិបាលអ៊ីរ៉ង់។

រដ្ឋមន្ត្រីក្រសួងរតនាគារអាមេរិក លោក ស្កុត បេសសេន (Scott Bessent) បានសង្កត់ធ្ងន់ថា «របបអ៊ីរ៉ង់កំពុងបង់ខាតតម្លៃសេដ្ឋកិច្ចយ៉ាងធ្ងន់ធ្ងរ ខណៈរូបិយប័ណ្ណខ្លួនធ្លាក់ចុះដល់កម្រិតទាបបំផុតមិនធ្លាប់មាន។ អាមេរិកនឹងបន្តកាត់ផ្តាច់ច្រកសេដ្ឋកិច្ចរបស់មន្ត្រីពុករលួយ និងអ្នកគាំទ្រហិរញ្ញវត្ថុរបស់ពួកគេ»។

គួររំលឹកថា កាលពីខែមករាកន្លងទៅ អាមេរិកទើបតែបានដាក់ទណ្ឌកម្មលើលោក ហ្សានចានី និងក្រុមហ៊ុនប្តូរប្រាក់ឌីជីថលដ៏ធំបំផុតរបស់លោកចំនួន ២ ជាលើកដំបូងរួចមកហើយ៕