(សាណា)៖ ក្រុមឧទ្ទាមហ៊ូទីគាំទ្រដោយអ៉ីរ៉ង់មានមូលដ្ឋានក្នុងប្រទេសយេម៉ែន បានអះអាងថាខ្លួនបានបើកការវាយប្រហារដោយបាញ់មីស៊ីលមួយគ្រាប់ លើអារ៉ាប៊ីសាអូឌីត នៅថ្ងៃសៅរ៍ ទី២៥ ខែកក្កដា ឆ្នាំ២០២៦ តែប៉ុន្មានម៉ោងប៉ុណ្ណោះបន្ទាប់ពីបានគំរាមសងសឹកទីក្រុងរីយ៉ាដ ខណៈសង្រ្គាមក្នុងតំបន់មជ្ឈិមបូព៌ាត្រូវបានពង្រីក។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ក្រុមចម្រុះដឹកនាំដោយអារ៉ាប៊ីសាអូឌីត កាលពីថ្ងៃសុក្រ បានបើកការវាយប្រហារតាមផ្លូវអាកាសលើគោលដៅយោធារបស់ក្រុមហ៊ូទី នៅក្នុងទីក្រុងកំពង់ផែ Hodeida ដែលប្រព័ន្ធផ្សព្វផ្សាយរបស់ក្រុមឧទ្ទាមមួយនេះ បានរាយការណ៍ពីមនុស្ស២នាក់បានរងរបួស ក្រោយហ៊ូទីប្រកាសពីការបិទខ្ទប់សមុទ្រប្រឆាំងនឹងអារ៉ាប៊ីសាអូឌីត និងវាយប្រហារលើកប៉ាល់ដឹកប្រេងរបស់អារ៉ាប៊ីសាអូឌីត។ ក្រុមហ៊ូទីបានឱ្យដឹងថាការវាយប្រហាររបស់អារ៉ាប៊ីសាអូឌីតលើហេដ្ឋារចនាសម្ព័ន្ធស៊ីវិលក្នុងទីក្រុងកំពង់ផែ Hodeida និងកោះ Kamaran គឺជាទង្វើបង្កើនជម្លោះដ៏គ្រោះថ្នាក់ ហើយហ៊ូទីត្រូវតែសងសឹកវិញ។

ប្រព័ន្ធផ្សព្វផ្សាយរបស់ហ៊ូទី Ansarollah នៅព្រឹកថ្ងៃសៅរ៍នេះបានរាយការណ៍ថាការវាយប្រហារដោយមីស៊ីលមួយគ្រាប់របស់យេម៉ែនបានបង្កជាអគ្គិភ័យនៅក្នុងទីក្រុង Jizan ភាគខាងត្បូងអារ៉ាប៊ីសាអូឌីតស្ថិតនៅក្បែរសមុទ្រក្រហម។ ភ្លាមៗ ខាងអារ៉ាប៊ីសាអូឌីតមិនបានធ្វើអត្ថាធិប្បាយអ្វីទេ។ ប៉ុន្តែទីភ្នាក់ងារការពារជនស៊ីវិលរបស់អារ៉ាប៊ីសាអូឌីត នៅព្រឹកថ្ងៃសៅរ៍នេះបានចេញសារព្រមានទៅកាន់ប្រជាជនក្នុងទីក្រុង Jizan និងទីក្រុង Yanbu ជាមួយការក្រើនរំឮកការប្រុងប្រយ័ត្នចំពោះលទ្ធភាពនៃការវាយប្រហាររបស់ក្រុមហ៊ូទី។ សារព្រមានតែស្រាប់តែត្រូវបានដកចេញវិញ នៅប៉ុន្មាននាទី ក្រោយមក៕