(ប៉េកាំង)៖ ខ្យល់បក់ខ្លាំង និងភ្លៀងធ្លាក់ដែលបង្កឡើងដោយព្យុះទីហ្វុង Noul បានចាប់ផ្ដើមវាយប្រហារលើប្រទេសចិន នៅថ្ងៃសៅរ៍ ទី២៥ ខែកក្កដា ឆ្នាំ២០២៦ ស្របពេលអាជ្ញាធរជំរុញឱ្យប្រជាជនចៀសវាងការធ្វើដំណើរដែលមិនចាំបាច់ ហើយសេវាដឹកជញ្ជូនមួយចំនួនត្រូវផ្អាកសកម្មភាពជាបណ្ដោះអាសន្ន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

Noul ដែលជាព្យុះទីហ្វុងទី១២ ក្នុងឆ្នាំនេះត្រូវបានព្យាករថានឹងវាយប្រហារលើតំបន់ឆ្នេរស្ថិតនៅចន្លោះទីក្រុងហុងកុង និងទីក្រុង Lufeng នៃខេត្ត Guangdong ភាគខាងត្បូងប្រទេសចិន អាចនៅយប់ថ្ងៃសៅរ៍ ឬព្រឹកថ្ងៃអាទិត្យចុងសប្ដាហ៍នេះ។ អាជ្ញាធរឧតុនិយមចិនក៏បានព្រមានដែរថាខេត្ត Guangdong និងខេត្តក្បែរខាងដូចជា Fujian, Jiangxi និងខេត្ត Hunan អាចនឹងទទួលរងផលប៉ះពាល់ដោយផ្ទាល់ពីព្យុះ Noul ជាមួយការជំរុញឱ្យប្រជាជនបង្កើនការប្រុងប្រយ័ត្ន និងចៀសវាងការធ្វើដំណើរដែលមិនចាំបាច់ ហើយត្រូវតាមដានការព្រមាន ឬការព្យាករអាកាសធាតុ។

គិតត្រឹមល្ងាចថ្ងៃសុក្រម្សិលមិញ ប្រជាជន ២០ ០០០នាក់ ត្រូវបានជម្លៀសនៅតាមតំបន់មួយចំនួនក្នុងខេត្ត Guangdong ជាទីដែលអាជ្ញាធរបានចាប់ផ្ដើមផ្អាកដំណើរការសេវាផ្លូវដែកនៅថ្ងៃសៅរ៍នេះ។ រីឯរថភ្លើងល្បឿនលឿន និងរថភ្លើងធម្មតាត្រូវបានរំពឹងថានឹងផ្អាកនៅថ្ងៃអាទិត្យ។ មិនតែប៉ុណ្ណោះ ចាប់តាំងពីថ្ងៃអាទិត្យចុងសប្ដាហ៍នេះផងដែរ ប្រតិបត្តិការនៅតាមអាកាសយានដ្ឋាននៅទូទាំងទីក្រុង ហុងកុង Guangzhou, ​Shenzhen, Zhuhai និងទីក្រុង Xiamen ក៏អាចនឹងរងផលប៉ះពាល់ផងដែរ៕