(ដាម៉ាស)៖ អគ្គលេខាធិការអង្គការសហប្រជាជាតិ (UN) លោក Antonio Guterres បានសន្យាផ្តល់ជំនួយសម្រាប់ការកសាងប្រទេសស៉ីរីឡើងវិញ អំឡុងពេលបំពេញទស្សនកិច្ចលើកដំបូងទៅកាន់ទីក្រុង Damascus ដោយប្រមុខ UN កំពុងកាន់តំណែងគិតចាប់តាំងពីឆ្នាំ២០០៩ ពោលគឺមុនផ្ទុះសង្គ្រាមស៉ីវិលស៉ីរី។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសៅរ៍ ទី២៥ ខែកក្កដា ឆ្នាំ២០២៦។

ទីភ្នាក់ងារព័ត៌មានរដ្ឋ SANA របស់ស៉ីរី បានរាយការណ៍ថា ប្រធានាធិបតី លោក Ahmed al-Sharaa បានទទួលស្វាគមន៍ លោក Guterres នៅវិមានប្រធានាធិបតីក្នុងទីក្រុង Damascus ប៉ុន្តែមិនបានផ្តល់ព័ត៌មានលម្អិតបន្ថែមនោះទេ។

បន្ទាប់ពីជំនួបនោះ​ លោក Guterres បានធ្វេីសន្និសីទសារព័ត៌មានរួមជាមួយរដ្ឋមន្ត្រីការបរទេសស៉ីរី លោក Asaad al-Shaibani ដោយបានថ្លែងថា «គ្មានប្រទេសណាមួយអាចងើបចេញពីជម្លោះដ៏ធ្ងន់ធ្ងរ ហើយកសាងខ្លួនឡើងវិញដោយខ្លួនឯងបានឡើយ»។ លោក Guterres បន្ថែមថា «យើងត្រូវតែជួយប្រទេសស៊ីរី ក្នុងឆន្ទៈ និងការប្តេជ្ញាចិត្តធ្វេីឱ្យបាន»។

ចំណែក លោក Shaibani បានបញ្ជាក់ជាថ្មីនូវសំណើសុំការគាំទ្របន្ថែមពីសហគមន៍អន្តរជាតិចំពោះស៉ីរី ជាពិសេសគឺសហភាពអឺរ៉ុប។ លោកបានលើកឡើងថា កិច្ចពិភាក្សារវាងលោក Guterres និងលោក Sharaa គឺផ្តោតលើការបង្កើនការគាំទ្រពី UN សម្រាប់ការកសាងឡើងវិញ និងផែនការរបស់រដ្ឋាភិបាលក្នុងការបិទជំរំជនភៀសខ្លួន។

គួរបញ្ជាក់ថា ទស្សនកិច្ចរបស់លោក Guterres គឺជាព្រឹត្តិការណ៍ដ៏សំខាន់មួយទៀតសម្រាប់ប្រទេសស៉ីរី ចាប់តាំងពីការទម្លាក់អតីតប្រធានាធិបតី Bashar al-Assad នៅចុងឆ្នាំ២០២៤ ដែលបានបិទបញ្ចប់សង្គ្រាមស៉ីវិលតាំងពីឆ្នាំ២០១១ និងបានបើកផ្លូវទៅរកដំណាក់កាលអន្តរកាលមួយ៕