«បណ្តុំវិកិណ្ណដ្ឋានបុរាណឧស្សាហកម្មសិប្បកម្មប៉សឺឡែន Jingdezhen» ត្រូវដាក់បញ្ចូលក្នុងបញ្ជីបេតិកភណ្ឌពិភពលោកដោយជោគជ័យ
26-07-2026 13:35
(ប៉េកាំង)៖ នៅថ្ងៃទី ២៥ ខែកក្កដា តាមម៉ោងក្នុងតំបន់ បន្ទាប់ពីការពិនិត្យពិភាក្សានៅក្នុងកិច្ចប្រជុំលើកទី ៤៨ នៃគណៈកម្មាធិការបេតិកភណ្ឌពិភពលោក របស់អង្គការយូណេស្កូនៅទីក្រុងប៊ូសាន ប្រទេសកូរ៉េខាងត្បូង គម្រោងនៃ «បណ្តុំវិកិណ្ណដ្ឋានបុរាណឧស្សាហកម្មសិប្បកម្មប៉សឺឡែន Jingdezhen»（Jingdezhen Handicraft Porcelain Industry Sites）ដែលបានស្នើដោយប្រទេសចិន ត្រូវបានដាក់បញ្ចូលក្នុងបញ្ជីបេតិកភណ្ឌពិភពលោកដោយជោគជ័យ។ គិតរហូតដល់បច្ចុប្បន្ន ចំនួនបេតិកភណ្ឌពិភពលោករបស់ប្រទេសចិនបានឡើងដល់ ៦១ គម្រោង។
សូមបញ្ជាក់ថា «បណ្តុំវិកិណ្ណដ្ឋានបុរាណឧស្សាហកម្មសិប្បកម្មប៉សឺឡែន Jingdezhen » គឺជាបណ្តុំវិកិណ្ណដ្ឋានបុរាណដែលតំណាងឱ្យប្រព័ន្ធឧស្សាហកម្មសិប្បកម្មប៉សឺឡែន Jingdezhen ចាប់ពីសតវត្សទី ១០ ដល់សតវត្សទី ១៩ ដែលបង្ហាញពីដំណើរការការអភិវឌ្ឍប្រកបដោយភាពច្នៃប្រឌិត នៃបច្ចេកទេសសិប្បកម្មប៉សឺឡែន សិល្បៈប៉សឺឡែន និងឧស្សាហកម្មផលិតប៉សឺឡែនរបស់ចិន និងជាសក្ខីភាពដែលបង្ហាញថា សិប្បកម្មប៉សឺឡែនរបស់ចិនបានជះឥទ្ធិពលយ៉ាងជ្រាលជ្រៅដល់ការអភិវឌ្ឍឧស្សាហកម្មសិប្បកម្មប៉សឺឡែនពិភពលោក ព្រមទាំងការផ្លាស់ប្តូរ និងការរៀនសូត្រពីអរិយធម៌គ្នាទៅវិញទៅមក។
លោក Rao Quan អនុរដ្ឋមន្ត្រីក្រសួងវប្បធម៌ និងទេសចរណ៍ចិន និងជាអគ្គនាយកនៃរដ្ឋបាលជាតិបេតិកភណ្ឌវប្បធម៌ចិន បានតំណាងឱ្យរដ្ឋាភិបាលចិនធ្វើការសន្យាយ៉ាងម៉ឺងម៉ាត់ថា នឹងបំពេញតាមអនុសញ្ញាបេតិកភណ្ឌពិភពលោក ដើម្បីពង្រឹងការអភិរក្ស ការបន្តវេន និងការប្រើប្រាស់បេតិកភណ្ឌជាប្រព័ន្ធនិងទូទៅ ធ្វើកិច្ចខំប្រឹងប្រែងជាមួយអង្គការអន្តរជាតិ និងរដ្ឋជាហត្ថលេខីនានា ដើម្បីរួមគ្នាការពារទ្រព្យសម្បត្តិ នៃអរិយធម៌មនុស្សជាតិឱ្យបានល្អ៕
វិទ្យុមិត្តភាពកម្ពុជាចិន
