(កៀវ)៖ រដ្ឋធានីកៀវរបស់ប្រទេសអ៊ុយក្រែន បានទទួលរងការវាយប្រហារដោយមីស៊ីលផ្លោងពីសំណាក់កងកម្លាំងរុស្ស៊ីនៅព្រឹកព្រលឹមថ្ងៃអាទិត្យ ខណៈដែលការទម្លាក់គ្រាប់បែកនៅតាមតំបន់ផ្សេងៗទៀតនៅពេលថ្ងៃ បានបណ្តាលឱ្យមនុស្ស ២នាក់បាត់បង់ជីវិត។ ចំណែកឯភាគីរុស្ស៊ីវិញ ក៏បានអះអាងផងដែរថា ជនស៊ីវិល ៤នាក់ត្រូវបានសម្លាប់នៅក្នុងការវាយប្រហារដោយយន្តហោះដ្រូនរបស់អ៊ុយក្រែន នៅក្នុងទីក្រុងកាន់កាប់ដោយរុស្ស៊ី។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

កងទ័ពអាកាសអ៊ុយក្រែនបានរាយការណ៍ថា កាលពីយប់មិញ រុស្ស៊ីបានបាញ់មីស៊ីលផ្លោងចំនួន ៧គ្រាប់ និងដ្រូនចំនួន ១៣៦គ្រឿង មកលើប្រទេសអ៊ុយក្រែន។ នៅក្នុងការវាយប្រហារពេលថ្ងៃ មនុស្សម្នាក់បានស្លាប់ និង ១២នាក់ទៀតរងរបួសនៅទីក្រុង ខាកគីវ (Kharkiv) ខណៈការវាយប្រហារដោយគ្រាប់បែករអិល (Glide Bomb) នៅទីក្រុង សាផូរីហ្ស៊ីយ៉ា (Zaporizhzhia) បានសម្លាប់មនុស្សម្នាក់ និងរបួស ៦នាក់។

អភិបាលក្រុងកៀវ លោក វីតាលី ក្លីតឆ្កូវ (Vitali Klitschko) បានបញ្ជាក់ថា គ្រាប់មីស៊ីលបានបង្កឱ្យមានអគ្គិភ័យឆាបឆេះអគារស្នាក់នៅមួយកន្លែង និងធ្វើឱ្យមនុស្ស ៣នាក់រងរបួសក្នុងរដ្ឋធានី។ គួររំលឹកថា កាលពីថ្ងៃសុក្រ ប្រធានាធិបតី លោក វ៉ូឡូឌីមៀ ហ្សេឡេនស្គី (Volodymyr Zelenskiy) ធ្លាប់បានព្រមានរួចជាស្រេចថា ការវាយប្រហាររបស់រុស្ស៊ីអាចនឹងកើតឡើងក្នុងរយៈពេល ៤៨ម៉ោង។

ទន្ទឹមនឹងនេះ ទីភ្នាក់ងារសារព័ត៌មានរដ្ឋ TASS បានដកស្រង់សម្តីអភិបាលក្រុង ហ័រលីវកា (Horlivka) ក្នុងតំបន់ដូណេត (Donetsk) ដែលលើកបន្តុបដោយរុស្ស៊ីថា ជនស៊ីវិល ៤នាក់ត្រូវបានសម្លាប់ដោយដ្រូនរបស់អ៊ុយក្រែន ប៉ុន្តែមិនបានបញ្ជាក់ព័ត៌មានលម្អិតនោះទេ។ កាលពីថ្ងៃសៅរ៍ អាជ្ញាធររុស្ស៊ីក៏បានចោទប្រកាន់អ៊ុយក្រែនថាមានចេតនាវាយប្រហារជនស៊ីវិល បន្ទាប់ពីមនុស្ស ១២នាក់បានស្លាប់ក្នុងជំរំលំហែកាយមួយ នៅតំបន់គ្រប់គ្រងដោយរុស្ស៊ី។

ទោះជាយ៉ាងណា ទាំងរុស្ស៊ី និងអ៊ុយក្រែន សុទ្ធតែបានចេញមុខបដិសេធរាល់ការចោទប្រកាន់ថា ខ្លួនបានកំណត់គោលដៅវាយប្រហារដោយចេតនាទៅលើជនស៊ីវិល បើទោះបីជាសង្គ្រាមតាំងពីដើមឆ្នាំ២០២២ មកនេះ បានឆក់យកជីវិតជនស៊ីវិលរាប់ពាន់នាក់ (ភាគច្រើនជាជនជាតិអ៊ុយក្រែន) ក៏ដោយ៕