(ប៉េកាំង)៖ នៅថ្ងៃចន្ទ ទី២៧ ខែកក្កដា ឆ្នាំ២០២៦ ប្រធានាធិបតីចិន លោក ស៉ី ជីនពីង បានប្រាប់សមភាគីប្រេស៉ីល លោក Luiz Inacio Lula da Silva ថា រូបលោកគាំទ្រប្រទេសអាមេរិកខាងត្បូងមួយនេះ ក្នុងការប្រឆាំងទប់ទល់ទង្វើជ្រៀតជ្រែតពីខាងក្រៅ។ នេះបើតាមការចេញផ្សាយដោយ ទីភ្នាក់ងារព័ត៌មាន Xinhua។

អំឡុងកិច្ចសន្ទនាមួយតាមទូរសព្ទ ដែលមានរយៈពេលជាងមួយម៉ោង លោក ស៉ី បានប្រាប់ទៅកាន់ លោក Lula យ៉ាងដូច្នេះថា «ចិនឱ្យតម្លៃជាខ្លាំងចំពោះ​ឋានៈអន្តរជាតិនិ ងឥទ្ធិពលដ៏សំខាន់របស់ប្រេស៉ីល។ ទីក្រុងប៉េកាំងគាំទ្រប្រេស៉ីល ក្នុងការរក្សាការពារអធិបតេយ្យនិងឯករាជ្យភាព​របស់ខ្លួន និងក្នុងការប្រឆាំងទង្វើជ្រៀតជ្រែកពីខាងក្រៅ ព្រមទាំងក្នុងការចូលរួមចំណែករក្សាស្ថិរភាពនិងសុខសន្តិភាពតំបន់ ក៏ដូចជាពិភពលោកទាំងមូល»។

កិច្ចសន្ទនាខាងលើរវាងលោក ស៉ី និងលោក Lula កើតមានឡើង តិចជាង៣ខែ មុនការបោះឆ្នោតដ៏តឹងតែងមួយនៅប្រេស៉ីល ដែលលោក Lula នឹងត្រូវប្រកួតប្រជែងជាមួយបេក្ខជនស្តាំនិយម លោក Flavio Bolsonaro ដែលជាកូនប្រុសរបស់អតីតប្រធានាធិបតីប្រេស៉ីល លោក Jair Bolsonaro។

គួរបញ្ជាក់ថា ក្នុងខែកក្កដានេះ ទីក្រុងវ៉ាស៉ីនតោន បានដំឡើងពន្ធសរុប២លើកថែមទៀត ទៅលើផលិតផលចម្រុះរបស់ប្រេស៉ីល ក្រោយការដំឡើងពន្ធខ្ពស់ដំបូងកាលពីឆ្នាំ២០២៥ ដើម្បីជាការសងសឹកសម្រាប់រឿងក្តី ដែលបានធ្វើឱ្យលោក Jair Bolsonaro ត្រូវទទួលរងការផ្តន្ទាទោសដាក់ពន្ធនាគារ។ លោក Bolsonaro ត្រូវគេស្គាល់ថា មានទំនាក់ទំនងជិតស្និទ្ធ ជាមួយប្រធានាធិបតីអាមេរិក លោក ដូណាល់ ត្រាំ។ លោក Lula បានថ្កោលទោសសម្ពាធពន្ធគយរបស់ទីក្រុងវ៉ាស៉ីនតោន ថាជាការប៉ុនប៉ងជះឥទ្ធិពលនយោបាយ ក្នុងឆ្នាំបោះឆ្នោតនៅប្រទេសប្រេស៉ីល៕