ប្រទេសចិន ប្រមូលបានផលស្បៀងរដូវក្តៅយ៉ាងច្រើនតាមរយៈការអភិវឌ្ឍកសិកម្មទំនើប
27-07-2026 17:54
(ប៉េកាំង)៖ លោក Xi Jinping ប្រធានរដ្ឋចិនយកចិត្តទុកដាក់ខ្ពស់ ចំពោះផលិតកម្មស្បៀង ហើយបានចុះត្រួតពិនិត្យ និងស្វែងយល់ពីស្ថានភាពនៃការលូតលាស់នៃដំណាំជាច្រើនលើកនៅតាមវាលស្រែ និងតម្រូវឱ្យអាជ្ញាធរមូលដ្ឋានធ្វើការងារកសិកម្មឱ្យបានល្អ ។ ក្នុងឆ្នាំ២០២៦ ប្រទេសចិនប្រមូលផលស្បៀងរដូវក្តៅបានច្រើនម្តងទៀត។ យោងតាមទិន្នន័យរបស់រដ្ឋបាលជាតិស្ថិតិចិនបានបង្ហាញថា ក្នុងឆ្នាំ២០២៦ ប្រទេសចិនប្រមូលផលស្បៀងរដូវក្តៅទម្ងន់សរុបឡើងដល់ ១៥០,៧៥ លានតោន កើនឡើង ១ ពាន់លានតោន បើប្រៀបធៀបទៅនឹងឆ្នាំ ២០២៥។
បច្ចុប្បន្នខណៈពេលរដូវក្តៅ កសិករក្នុងតំបន់នានាទូទាំងប្រទេសចិនកំពុងមមាញឹកនឹងការធ្វើស្រែចម្ការ ដូចជាការសាបព្រោះ និងការថែទាំដំណាំផ្សេងៗជាដើម ដើម្បីប្រមូលផលស្បៀងយ៉ាងច្រើនក្នុងឆ្នាំនេះ។ពេលចុះត្រួតពិនិត្យការងារនៅខេត្តJilin នាឆ្នាំ២០២០ លោកXi Jinping ប្រធានរដ្ឋចិនបានគូសបញ្ជាក់ថា ត្រូវជំរុញឱ្យកសិករចេះប្រើប្រាស់បច្ចេកវិទ្យាកសិកម្មទំនើប ដើម្បីបង្កបង្កើនផលស្បៀងយ៉ាងច្រើនតាមរយៈបច្ចេកវិទ្យាទំនើបបំផុត។
សព្វថ្ងៃនេះ បច្ចេកវិទ្យា និងផលិតផលកសិកម្មថ្មីទំនើប ត្រូវបានប្រើប្រាស់យ៉ាងច្រើនតាមវាលស្រែចម្ការនានាទូទាំងប្រទេស ដែលបានលើកកម្ពស់ជាបន្តបន្ទាប់នូវកម្រិតគុណភាព និងប្រសិទ្ធភាពនៃផលិតកម្មកសិកម្ម និងក្លាយជាការគាំទ្រដ៏សំខាន់សម្រាប់ការធានាសន្តិសុខស្បៀង។
លោក Xi Jinping បានសង្កត់ធ្ងន់ថា «ធ្វើឱ្យការដាំដំណាំក្លាយជាមធ្យោបាយមួយដើម្បីសម្រេចបានជីវភាពធូរធា និងទាក់ទាញកសិករកាន់តែច្រើនឱ្យចូលរួមក្នុងការអភិវឌ្ឍកសិកម្មទំនើប»។ប្រទេសចិនកំពុងគ្រោងផែនការដើម្បីអភិវឌ្ឍកសិកម្មតាមបែបវិទ្យាសាស្ត្រ និងបច្ចេកវិទ្យា កសិកម្មបៃតង កសិកម្មប្រកបដោយគុណភាពខ្ពស់ និងកសិកម្មដែលមានម៉ាកយីហោល្បីល្បាញ ក៏ដូចជាជំរុញការអភិវឌ្ឍទីផ្សារផលិតផលកសិកម្មដែលមានតម្លៃសមរម្យនិងគុណភាពល្អ ដើម្បីលើកទឹកចិត្តឱ្យកសិករនាំគ្នាដាំដំណាំ ក្នុងន័យធានាសន្តិសុខស្បៀង និងតាំងមូលដ្ឋានគ្រឹះដ៏រឹងមាំសម្រាប់ការអភិវឌ្ឍសេដ្ឋកិច្ច និងសង្គមប្រកបដោយគុណភាពខ្ពស់៕
វិទ្យុមិត្តភាពកម្ពុជាចិន
