(វ៉ាស៊ីនតោន)៖ កាលពីថ្ងៃចន្ទ ទី២៧ ខែកក្កដា ឆ្នាំ២០២៦ សហរដ្ឋអាមេរិកបានចាប់ផ្តើមការពិនិត្យមើលឡើងវិញ លើវត្តមានយោធារបស់ខ្លួននៅអឺរ៉ុប បន្ទាប់ពីរដ្ឋមន្រ្តីការពារជាតិលោក Pete Hegseth បានប្រាប់បណ្តាសមភាគីនៃក្រុមប្រទេសសមាជិកអង្គការ NATO កាលពីខែមិថុនាថា ទីក្រុងវ៉ាស៊ីនតោន កំពុងត្រៀមរៀបចំធ្វើការវាយតម្លៃបែបនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក Elbridge Colby អនុរដ្ឋមន្ត្រីការពារជាតិអាមេរិក បានប្រកាសនៅលើបណ្តាញសង្គម X ថា «ដូចដែលលោករដ្ឋមន្ត្រី Hegseth បានលើកឡើងកន្លងមក គឺនេះនឹងជាការពិនិត្យឡើងវិញពិតប្រាកដមួយ ដែលរៀបចំឡើងដើម្បីធានាថា NATO កំពុងឆ្ពោះយ៉ាងរហ័សនិងមិនអាចត្រឡប់ក្រោយបាន ទៅរកការធ្វើឱ្យអឺរ៉ុបរ៉ាប់រងការទទួលខុសត្រូវស្នូល សម្រាប់​ការការពារខ្លួនពួកគេផ្ទាល់»។ លោក Colby បានបន្ថែមថា «លទ្ធផលនៃការពិនិត្យវាយតម្លៃឡើងវិញនេះ នឹងបង្កើនល្បឿននៃការធ្វើអន្តរកាលរបស់ NATO ទៅជាសម្ព័ន្ធភាពមួយ ដែលរឹងមាំ ស្មើភាពគ្នា និងមាននិរន្តរភាព»។

ប្រធានាធិបតីអាមេរិក លោក ដូណាល់ ត្រាំ ធ្លាប់បានរិះគន់សម្ព័ន្ធមិត្តអឺរ៉ុបជាច្រើនលើកច្រើនសា សម្រាប់ការឆ្លើយតបរបស់ពួកគេ ចំពោះសង្រ្គាមរបស់លោកនៅអ៉ីរ៉ង់ រួមទាំងការបដិសេធមិនអនុញ្ញាតឱ្យកងកម្លាំងអាមេរិក ប្រើប្រាស់មូលដ្ឋានយោធារបស់អឺរ៉ុប កាលពីពេលចាប់ផ្តើមជម្លោះ។ លោក Hegseth ក៏បានគំរាមកាត់បន្ថយ ការចំណាយរបស់ទីក្រុងវ៉ាស៊ីនតោនលើ NATO ផងដែរ លុះត្រាតែសម្ព័ន្ធមិត្តសម្រេចបាន នូវគោលដៅបង្កើនការចំណាយវិស័យការពារជាតិ។

ទីក្រុងវ៉ាស៊ីនតោន បានបញ្ជាក់យ៉ាងច្បាស់ជាមួយអឺរ៉ុបថា ខ្លួនចង់ឱ្យសម្ព័ន្ធមិត្ត NATO នៅលើទ្វីបអឺរ៉ុប ជាអ្នកទទួលខុសត្រូវចម្បង ចំពោះសន្តិសុខរបស់ពួកគេផ្ទាល់ ខណៈដែលសហរដ្ឋអាមេរិក បង្វែរការផ្តោតសំខាន់ទៅរកចិន។ ជាផ្នែកមួយនៃដំណើរការនោះ ក្រសួងការពារជាតិអាមេរិក បានប្រាប់សម្ព័ន្ធមិត្តរួចជាស្រេចថា ខ្លួនកំពុងកាត់បន្ថយធនធានយោធាទូទាំងពិភពលោក ដែលខ្លួនចូលរួមចំណែកសម្រាប់ប្រតិបត្តិការរបស់ NATO៕