(កៀវ)៖ លោក Yevhenii Khmara ដែលទើបត្រូវបានតែងតាំងជារដ្ឋមន្រ្តីការពារជាតិស្តីទីអ៊ុយក្រែន បាននិយាយក្នុងបទសម្ភាសមួយថា អ៊ុយក្រែនមិនអាចអាចតតាំងនឹងរុស្ស៉ី ក្នុងទម្រង់វាយស្មើដៃគ្នា នៅពេលដែលប្រឈមមុខជាមួយរុស្ស៉ីបានទេ ប៉ុន្តែត្រូវចេះប្រើប្រាស់ធនធានដោយប្រុងប្រយ័ត្ន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃពុធ ទី២៩ ខែកក្កដា ឆ្នាំ២០២៦។

ក្នុងបទសម្ភាសនៅទីក្រុងកៀវ ជាមួយអ្នកសរសេរប្លុកជនជាតិអាមេរិក អ្នកនាង Laura Loomer លោក Khmara ដែលជាអតីតប្រធានទីភ្នាក់ងារសន្តិសុខ SBU បាននិយាយទៀតថា ការគ្រប់គ្រងធនធាន និងការងារភស្តុភារ គឺជាផ្នែកដ៏សំខាន់មួយនៃការរៀបចំផែនការសមរភូមិ ជាពិសេសការធានាបានថា បណ្តាអង្គភាពមានសម្ភារៈបរិក្ខារចាំបាច់នៅក្នុងដៃ។

លោក Khmara បានបន្ថែមថា ការវាយប្រហាររបស់អ៊ុយក្រែន ចូលជ្រៅទៅក្នុងទឹកដីរុស្ស៉ី មានបំណងបង្កការខាតបង់ដល់រុស្ស៉ី ក្នុងកម្រិតធំជាងការចំណាយធ្វើសង្រ្គាម។ លោកក៏បានបង្ហាញក្តីរំពឹងថា ទំនាក់ទំនងរវាងអ៊ុយក្រែន និងសហរដ្ឋអាមេរិក នឹងវិវត្តទៅជាភាពជាដៃគូយុទ្ធសាស្ត្រយូរអង្វែង ដោយទីក្រុងកៀវ នឹងចែករំលែកបទពិសោធន៍នៃសង្គ្រាមសម័យទំនើប។

គួរបញ្ជាក់ថា ការវាយប្រហាររយៈចម្ងាយមធ្យម និងឆ្ងាយរបស់អ៊ុយក្រែន ដែលផ្តោតទៅលើហេដ្ឋារចនាសម្ព័ន្ធនៃឧស្សាហកម្មប្រេង បានបង្កឱ្យមានការខ្វះខាតប្រេងឥន្ធនៈ នៅតាមតំបន់នានារបស់រុស្ស៉ី។ ទោះបីជារុស្ស៉ី អះអាងថាខ្លួនបានកាន់កាប់តំបន់ខ្សែបន្ទាត់ជួរមុខប្រវែង ១ ២០០គីឡូម៉ែត្រក៏ដោយ តែកងទ័ពអ៊ុយក្រែន អាចទប់ឱ្យការរុលទៅមុខរបស់រុស្ស៉ី មានភាពយឺតយ៉ាវ៕