(វ៉ាស៉ីនតោន)៖ រដ្ឋបាលលោក ត្រាំ បានដាក់បម្រាមលើការនាំចូលមនុស្សយន្តរ៉ូបូត និងឧបករណ៍បំប្លែងថាមពលមកពីចិន ក្នុងគោលដៅការពារការអភិវឌ្ឍបច្ចេកវិទ្យាបញ្ញាសិប្បនិម្មិត (AI) របស់សហរដ្ឋអាមេរិក ពីការគំរាមកំហែងដល់សន្តិសុខជាតិ និងដើម្បីនាំឧស្សាហកម្មដ៏សំខាន់មួយនេះ ត្រឡប់មករកការផលិតក្នុងស្រុកវិញ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នាថ្ងៃពុធ ទី២៩ ខែកក្កដា ឆ្នាំ២០២៦។

គណៈកម្មការទំនាក់ទំនងសហព័ន្ធ (FCC) បានប្រកាសហាមប្រាមនាំចូលនូវប្រភេទរ៉ូបូតរូបរាងមនុស្ស និងរ៉ូបូតមានជើង ៤ ព្រមទាំងឧបករណ៍បំប្លែងថាមពល និងឧបករណ៍ប្រើប្រាស់ក្នុងមជ្ឈមណ្ឌលផ្ទុកទិន្នន័យ។ រដ្ឋបាលលោក ត្រាំ មានបំណងការពារខ្សែច្រវាក់ផ្គត់ផ្គង់ផ្នែក AI ពីការគំរាមកំហែងរបស់ចិន ពាក់ព័ន្ធនឹងការរំខានដំណើរការ លួចទិន្នន័យ និងការវាយប្រហារព័ត៌មានវិទ្យា ព្រមទាំងជំរុញឱ្យក្រុមហ៊ុននានា ផ្លាស់ប្តូរការផលិតមកកាន់សហរដ្ឋអាមេរិក។

ស្ថានទូតចិនប្រចាំទីក្រុងវ៉ាស៉ីនតោន បានលើកឡើងថាប៉េកាំង ជំរុញឱ្យសហរដ្ឋអាមេរិក យកចិត្តទុកដាក់ចំពោះការបញ្ចេញមតិ ពីសំណាក់សហគមន៍ធុរកិច្ចនៃប្រទេសទាំងពីរ ហើយឈប់បង្ខូចកេរ្តិ៍ឈ្មោះក្រុមហ៊ុនចិន និងការគំរាមកំហែងដាក់ទណ្ឌកម្ម លើក្រុមហ៊ុនទាំងនោះ។ ស្ថានទូតបន្ថែមថា រដ្ឋាភិបាលចិននឹងចាត់វិធានការចាំបាច់ទាំងអស់ ដើម្បីឆ្លើយតបទៅនឹង សកម្មភាពណាមួយ ដែលបង្កការខូចខាតធ្ងន់ធ្ងរដល់ផលប្រយោជន៍របស់ខ្លួន៕