(កៀវ)៖ អាជ្ញាធរអ៊ុយក្រែន បានអះអាងថា ការវាយប្រហារថ្មីចុងក្រោយតាមផ្លូវអាកាសរបស់រុស្ស៉ីលើអ៊ុយក្រែន នាថ្ងៃព្រហស្បតិ៍ ទី៣០ ខែកក្កដា ឆ្នាំ២០២៦ បានផ្តាច់ជីវិតមនុស្សយ៉ាងហោច ៨នាក់ រួមមានទាំងម្នាក់នៅរដ្ឋធានីកៀវ ហើយទីក្រុង Lviv នៅឯភាគខាងលិចប្រទេសឯណោះ ក៏ជាគោលដៅផងដែរ ព្រមទាំងបង្ខំឱ្យប្រទេសជិតខាង គឺប៉ូឡូញត្រូវចល័តយន្តហោះចម្បាំង ដើម្បីធានាសុវត្ថិភាពដែនអាកាសរបស់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

សំឡេងស៉ីរ៉ែនប្រកាសអាសន្ន ត្រូវបានបន្លឺឡើងនៅតំបន់ភាគច្រើនទូទាំងអ៊ុយក្រែន រួមជាមួយស្នូរផ្ទុះ។ អភិបាលទីក្រុងកៀវ លោក Vitali Klitschko បាននិយាយថា ទីតាំងមួយចំនួនប៉ុន្តែមិនមែនជាកន្លែងអគារស្នាក់នៅ បានរងការឆាបឆេះ។ នៅទីនោះ មានមនុស្សម្នាក់បានស្លាប់ និង២នាក់បានរងរបួស។ ចំណែក នៅតំបន់ Dnipropetrovsk មានមនុស្ស៦នាក់ទៀត​ ស្លាប់ ក្នុងនោះ២នាក់ជាក្មេង។ រីឯនៅតំបន់ Poltava ក៏មានម្នាក់ស្លាប់ផងដែរ។

នៅទីក្រុង Kryvyi Rih ដែលស្ថិតក្នុងតំបន់ Dnipropetrovsk ក្មេងស្រីអាយុ៥ឆ្នាំ និង១២ឆ្នាំ គឺស្ថិតក្នុងចំណោម​មនុស្សដែលស្លាប់៦នាក់ខាងលើ ហើយមាន៨នាក់ផ្សេងទៀតរងរបួស ក្នុងអ្វីដែលអាជ្ញាធរនៅ​ទីក្រុងនោះផ្ទាល់ បានអះអាងថា ជាការវាយប្រហារនៃមីស៉ីលបាលិស្ទីគ Iskander-M របស់រុស្ស៉ី។

ដោយឡែក នៅទីក្រុង Lviv កៀកនឹងប្រទេសប៉ូឡូញ អគារស្នាក់នៅ២ខ្នង បានរងការខូចខាតដោយសារមីស៉ីលរុស្ស៉ី ហើយ​មនុស្ស២៦នាក់បានរងរបួស និងមួយចំនួនជាប់ក្រោមគំនរបាក់បែក។ យោធាប៉ូឡូញ បានឱ្យដឹងថា យន្តហោះចម្បាំងត្រូវបាន​ចល័តទៅការពារដែនអាកាសប្រទេសរបស់ខ្លួន ចំពោះមុខការវាយប្រហារតាមផ្លូវអាកាសរបស់រុស្ស៉ីលើអ៊ុយក្រែន។

គួរបញ្ជាក់ថា នៅថ្ងៃព្រហស្បតិ៍នេះ ក្រសួងការពារជាតិរុស្ស៉ី បានប្រកាសថា កងកម្លាំងរុស្ស៉ីបានបើកការវាយប្រហារលើ អ្វីដែល​ខ្លួនអះអាងថា ជាមូលដ្ឋានយោធានៅពាសពេញអ៊ុយក្រែន ក្នុងតំបន់រាប់ចាប់តាំងពីរដ្ឋធានីកៀវ រហូតដល់ទីក្រុង Lviv និង ទីក្រុង Dnipropetrovsk ព្រមទាំងកប៉ាល់ដឹកទំនិញ៣គ្រឿងថែមទៀត៕