(សាន់សាល់វ៉ាឌ័រ)៖ តុលាការនៅនៅប្រទេសអែលសាល់វ៉ាឌ័រនៃតំបន់អាមេរិកកណ្តាល បានកាត់ទោសសមាជិកក្រុមជនពាល ដែលត្រូវបានរកឃើញថា មានទោសពីបទជួញដូរគ្រឿងញៀន លាងលុយកខ្វក់ និងប្រព្រឹត្តិឧក្រិដ្ឋកម្មផ្សេងៗទៀត ឱ្យជាប់ពន្ធនាគារម្នាក់ៗ គឺលើសពី១០០០ ឆ្នាំ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃព្រហស្បតិ៍ ទី៣០ ខែកក្កដា ឆ្នាំ២០២៦។

ការកាត់ទោសដ៏ធ្ងន់នេះកើតឡើង នៅក្នុងបរិបទនៃការបន្តសង្រ្គាមប្រឆាំងក្រុមជនពាល របស់ប្រធានាធិបតីស្តាំនិយម លោក Nayib Bukele ដែលបានចាប់ផ្តើម កាលពីឆ្នាំ២០២២ និងដែលនាំឱ្យមានការចាប់ខ្លួនសមាជិកក្រុមជនពាលសរុបជាង ៩០ ០០០នាក់ ដោយក្នុងនោះជាច្រើននាក់ ត្រូវបានឃុំខ្លួននៅក្នុងពន្ធនាគារដែលមានសន្តិសុខរឹងមាំបំផុតរបស់ប្រទេសនេះ។

រដ្ឋអាជ្ញាអែលសាល់វ៉ាឌ័រ បានអះអាងថា ក្រុមជនពាលខាងលើ ដែលជាសមាជិកក្រុមហៅថា El Gremio ត្រូវបានផ្តន្ទាទោស ពីបទ «ជួញដូរគ្រឿងញៀន លាងលុយកខ្វក់ និងការបង្កើតបណ្តាញបក្ខពួកខុសច្បាប់»។ ២នាក់ក្នុងចំណោមសមាជិកជនពាលសរុប២៨នាក់ ត្រូវបានកាត់ទោសឱ្យជាប់ពន្ធនាគាររហូតដល់ ១០៤៨ឆ្នាំ។

កាលពីខែមីនា សភាដែលគ្រប់គ្រងដោយលោក Bukele បានអនុម័តកំណែទម្រង់រដ្ឋធម្មនុញ្ញ ដែលបានលុបចោលការកាត់ទោសអតិបរមាបានត្រឹម ៦០ឆ្នាំ កាលពីមុន ហើយជំនួសមកវិញ ដោយការជាប់ពន្ធនាគារអស់មួយជីវិត សម្រាប់ឃាតករ ជនប្រព្រឹត្តអំពើចាប់រំលោភ និងភេរវករ។ ទោសអតិបរមានោះ ក្រោយមកត្រូវបានពង្រីកបន្ថែម ដើម្បីអនុវត្តចំពោះ អ្នកដែលមានអាយុក្រោម ១៨ឆ្នាំផងដែរ។

លោក Bukele ត្រូវគេដឹងថាគ្រប់គ្រងប្រទេសអែលសាល់វ៉ាឌ័រ លក្ខណៈបែបផ្តាច់ការ ហើយក្រុមអង្គការក្រៅរដ្ឋាភិបាល បានចោទថា ប្រទេសនេះខ្វះឯករាជ្យភាពផ្នែកតុលាការ។ ក្រុមសិទ្ធិមនុស្ស ក៏បានចោទប្រកាន់រដ្ឋាភិបាលលោក Bukele ពីបទប្រព្រឹត្តឧក្រិដ្ឋកម្មប្រឆាំងមនុស្សជាតិ និងការចាប់ឃុំខ្លួនអ្នកស្លូតត្រង់ ផងដែរ។ តាមអង្គការលើកលែងទោសអន្តរជាតិ Amnesty International មនុស្សរាប់រយនាក់បានស្លាប់អំឡុងការជាប់ឃុំឃាំង និងរាប់ពាន់នាក់ បានប្រឈមមុខការចាប់ឃុំខ្លួនតាមតែអំពើចិត្ត ក្នុងអំឡុងការបង្ក្រាបប៉ុន្មានឆ្នាំមកនេះរបស់លោក Bukele៕