(មូស្គូ)៖ ក្រុមហ៊ុនលក់ទំនិញអនឡាញធំបំផុតរបស់ប្រទេសរុស្ស៉ី Wildberries ព្រមទាំងអាជ្ញាធរក្នុងតំបន់ នៅថ្ងៃព្រហស្បតិ៍ ទី៣០ ខែកក្កដា ឆ្នាំ២០២៦ បានឱ្យដឹងថា ឃ្លាំងស្តុកទំនិញចំនួន ២ទៀតរបស់ក្រុមហ៊ុន បានរងការវាយប្រហារពីដ្រូនអ៊ុយក្រែន កាលពីវេលាយប់កន្លងទៅ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

អភិបាលតំបន់ Penza ភាគខាងលិចប្រទេសរុស្ស៉ី បានអះអាងថា មនុស្សម្នាក់បានរងរបួស ហើយបុគ្គលិកជាង២០០នាក់ ត្រូវបានជម្លៀសខ្លួន ក្រោយការវាយប្រហារដោយដ្រូន បានបង្កជាអគ្គិភ័យ នៅឃ្លាំងស្តុកទំនិញមួយកន្លែងរបស់ក្រុមហ៊ុន Wildberries។ ដោយឡែក ក្រុមហ៊ុនផ្ទាល់ក៏បានឱ្យដឹងដែរថា ឃ្លាំងស្តុកទំនិញមួយកន្លែងទៀតរបស់ខ្លួន ត្រូវបានវាយប្រហារ​ដោយដ្រូនអ៊ុយក្រែន នៅទីក្រុង Sarapul ចម្ងាយប្រហែល១១០០គីឡូម៉ែត្រ ពីភាគខាងកើតរដ្ឋធានីមូស្គូ ហើយអគ្គិភ័យបានកើតឡើង។

អ៊ុយក្រែនបានចាប់ផ្តើមកំណត់គោលដៅលើឃ្លាំងរបស់ក្រុមហ៊ុន Wildberries ជាលើកដំបូង កាលពីថ្ងៃទី១៨-១៩ ខែកក្កដា នៅតំបន់ Tambov ចម្ងាយប្រហែល ៤៨០គីឡូម៉ែត្រពីភាគអាគ្នេយ៍រដ្ឋធានីរបស់រុស្ស៉ី ព្រមទាំងនៅតំបន់មូស្គូផ្ទាល់ បណ្តាលឱ្យ​មានមនុស្សស្លាប់៨នាក់ ហើយធ្វើឱ្យអគារទាំងនោះឆេះខ្ទេចខ្ទីទាំងស្រុង។ ចាប់តាំងពីពេលនោះ អ៊ុយក្រែនបានបើកការវាយប្រហារលើ​ឃ្លាំងជាច្រើនទៀតរបស់ក្រុមហ៊ុន នៅទូទាំងប្រទេសរុស្ស៉ី។ ទីក្រុងកៀវចោទថា ទីតាំងទាំងអស់នោះ គឺជាផ្នែកនៃបណ្តាញឡូជីស្ទីគសម្រាប់យោធារុស្ស៉ី។

គួរបញ្ជាក់ថា រយៈពេលជាង៤ឆ្នាំកន្លះមកនេះ ក្រោយរុស្ស៉ីបានបើកការឈ្លានពានលើអ៊ុយក្រែន កិច្ចប្រឹងប្រែងការទូត ដើម្បីស្វែងរកទីបញ្ចប់សម្រាប់ជម្លោះនៅតែបន្តជាប់គាំង ហើយប្រទេសទាំងពីរ បាននិងកំពុងបង្កើនការវាយប្រហាររយៈចម្ងាយឆ្ងាយតាមផ្លូវអាកាសរៀងៗខ្លួន៕